“Namanganlik muxlislar bunday rahbariyatga munosib emas”. Andrey Kanchelskis 1,6 mln dollar kompensatsiya, “Navbahor” va o‘zbek futbolidagi noprofessionallar haqida

“Navbahor” klubi sobiq bosh murabbiyi Andrey Kanchelskis “Match TV”ga intervyu berdi. Unda mutaxassis va Namangan shahri jamoasi o‘rtasida yuzaga kelgan muammo haqida so‘z bordi.

Andrey Kanchelskis maoshi vaqtida to‘lab berilmagani sababli “Navbahor” jamoasidan iste’foga chiqqan edi. Bu masala yuzasidan murabbiy FIFAga shikoyat xatini yozgan. FIFA Kanchelskis va “Navbahor” o‘rtasidagi nizoni rossiyalik murabbiy foydasiga hal qildi.

Shartnomani bekor qilishiga sabab nimaligi haqida

Birinchi o‘rinda futbol, ikkinchi o‘rinda inson faktori tufayli. Mehnating uchun maosh bermaydigan joyda ishlab bo‘lmaydi. Sabr tugaydi. Klubda ishlaydigan noprofessional insonlar ham bunga sabab bo‘ldi. Ular bilan doim nizoga borish yaramaydi. Futbolga aloqasi yo‘q insonlarga nimanidir isbotlash qiyin. ‘Navbahor’ muxlislari, Namangan ahli bunday rahbariyatga munosib emas. Respublikaning boshqa jamoalarida ham noprofessionallar yetarlicha.

Bu noprofessional shaxslar kimligi haqida

Ular klub tizimiga kiradigan odatiy tadbirkorlar. Rossiyada ham bunday insonlar bor. Boshqa sohadan kirib keladi va mutaxassislarga futbolni o‘rgatishga urinadi. O‘z vaqtida ‘Volga’ boshqaruv kengashi raisi Svatkovskiy kelib futbolchilarga 2—3 soat yugurish kerakligini o‘rgatgandi. Hamma narsaga tushunadigan inson munosabat bildirish lozim, har kim o‘z ishi bilan shug‘ullanishi kerak.

Aynan o‘sha tadbirkorlar sizni ishga olmaganmi?

Yo‘q, men Namangan viloyati hokimi bilan gaplashganman. Keyin u boshqa lavozimga o‘tib ketdi. Men u yerdaligimda rahbariyat 3 marta almashdi. Almashinuv doim ham yaxshi bo‘lavermaydi. Ikkinchi murabbiy Aleksey Belenkov bilan birga bunga e’tibor qilmaslikka va maksimum ishlashga harakat qilardik. Oqibatda Belenkovni noma’lum sabablarga ko‘ra ayblashdi va ishdan olishdi. U ham FIFAga shikoyat yozgan va natijasini kutyapti.

Aleksey Belenkov oldinroq shikoyat yozgan bo‘lishiga qaramasdan uning arizasi haligacha ko‘rib chiqilayotgani haqida

Belenkov ishi bo‘yicha FIFA allaqachon qaror qabul qilgan. Endi CAS’ning (sport arbitraj sudi) qarorini kutyapti.

Klub murosa variantlarini taklif qilgani haqida

Shartnomamda 200 ming dollar ustama, yana to‘liq maoshim, davolanish uchun ketadigan xarajatlar yozilgan va men kelishuvga tayyor edim. Endi esa hech qanday murosa haqida gap bo‘lishi mumkin emas. Klub o‘tgan yili Toshkentdagi xususiy shifoxonada koronavirusdan davolanganimdagi xarajatlarni to‘lab bermadi, garchi katta pul sarflanmagan bo‘lsa-da. Shartnomada esa davolanish xarajatlari qoplanishi keltirilgandi. Mana insoniy munosabat. Hozir ular qandaydir variantlar bilan oldimga kelmoqda, lekin endi hech narsaning iloji yo‘q.

Bu klub uchun qanday oqibatlarni olib kelishi haqida

‘Navbahor’ qanday qaror qabul qilishini bilmayman. Odamlar bunday harakatlarga yo‘l qo‘yilmasligini tushunishini istardim. FIFA va CAS kabi tizimlar faoliyat ko‘rsatishini bilishlarini xohlardim. Insonlar nafaqat futbolda, barcha sohada o‘zini bunday tutishi kerak emas.

“Navbahor” rahbariyati uni ichkilikbozlikda ayblagani haqida 

Ular o‘zini oqlash uchun nimadir deyishi kerak-ku. Aftidan, ular Romashenkoning so‘zlariga yopishib olgan. ‘Navbahor’ bazasida yashaganman. Men bilan birga ishlagan birorta futbolchi shunday ekanligini aytsa, ana unda bu savol muhokama qilishga arziydi. Bu tuhmatligi ko‘rinib turibdi.

“Navbahor”ga qaytganidan afsuslanmasligi haqida

Qachonki sen bilan hokimning o‘zi gaplashsa va barchasini boshidan boshlashni taklif qilsa, uni rad etish juda qiyin. Afsuslanmayman. Pandemiyaga qadar natijalarimiz yaxshi edi, biz uchinchi o‘ringa chiqqandik. Keyin esa butun jamoa bilan birga koronavirusga chalindik. Rahbariyat esa qo‘llab-quvvatlash o‘rniga bizga negativ sochishni boshladi. Klubning moliyaviy ahvolini hisobga olib, maoshim qisqarishiga ham rozi bo‘lgandim. Lekin ular buni hisobga olmadi.

“Navbahor”dagi ishini o‘zi qanday baholashi haqida 

O‘z mehnatimni baholash juda qiyin. Klubda bo‘lgan vaqtim jamoaning uch futbolchisi milliy terma jamoaga chaqirildi, yana biri Olimpiya termasidan chaqiruv oldi. O‘runov Rossiya chempionatiga yo‘l oldi. Alisher Usmonovning ‘Nosta’ jamoasi haqidagi so‘zlarini eslayman, o‘shanda Usmonov hech bo‘lmaganda bitta futbolchi Rossiya terma jamoasiga chaqirilsa — bu katta yutuq ekanligini aytgandi. Semyonov terma jamoaga chaqirildi. Menimcha, bu ham ko‘rsatkich. Natijalarga keladigan bo‘lsak, “Paxtakor” bilan kurashish qiyin. Shunda ham biz ularga doim kurash taklif qilganmiz. Muxlislardan minnatdorman. Ular doim bizni qo‘llab-quvvatlagan. Vaziyat bunday tus olganidan afsusdaman.

O‘zbekiston futbol rahbariyatiga maslahatlari

Professional jamoalar boshqaruvini sinchkovlik bilan nazorat qilish kerak. Ba’zi jamoa rahbarlari davlat ajratgan mablag‘larni samarasiz ishlatmoqda. Musobaqa va klublar boshqaruvida noprofessional menejmentni ko‘ramiz. Buning oqibatida o‘zbek futbolining darajasi tushishi mumkin. Rossiyada ham shunaqa vaziyat. Professionallar yetishmaydi. O‘zbekiston futbol federatsiyasi qadriyat, imkoniyat va maqsadlardan kelib chiqib futbolni rivojlantirish bo‘yicha kompleks dastur ishlab chiqishi lozim. Masalan, nemis yoki niderlandcha modelni Rossiya futboliga olib kirsak, terma jamoamiz Germaniyaga aylanmaydi-ku.

O‘zbekistonda futbolni juda yaxshi ko‘rishadi va o‘ynashadi. Zaxira tayyorlashning samarali usullari va Yevropaning kuchli ligalariga futbolchilar yetkazib berish imkoniyatlari mavjud. Masalan, Ahmedov, Shomurodov yoki O‘runovni olaylik. Afsuski, O‘zbekistonda professional menejerlarni tayyorlash darajasini oshirish uchun sharoit yaratilmagan. Men o‘z tajribamdan kelib chiqib amin bo‘ldimki, federatsiya va liga rahbariyati ta’lim dasturini ishlab chiqishi va o‘zbek futboli faxriylariga menejment, iqtisodiyot va sport huquqi kabilarni o‘rgatishi kerak. Shunda davlat va biznes boshqaruvida tavakkalchiliklar va moliyaviy yo‘qotishlar kam bo‘ladi. Noprofessionallik va ochko‘zlik musobaqalar rivojiga to‘sqinlik qiladi. Shuning uchun mamlakatda futbolni yaxshi tushunadigan sifatli boshqaruvchilar kamyob. Xuddi shunday kadrlarni yetishtirish lozim.

Andrey Kanchelskis, “Navbahor” sobiq bosh murabbiyi