Buyuk Britaniya bosh vaziri Boris Jonson shaxsiy telefonidan ish masalalarida foydalangan, bu uning o‘z jamoasi tomonidan berilgan xavfsizlik bo‘yicha maxfiy tavsiyalariga zid, deb yozadi The Times.
Nashr ma’lumotlariga ko‘ra, Jonson Saudiya Arabistoni valiahd shahzodasi Muhammad bin Salmon va tadbirkor Jeyms Daysonga shaxsiy telefonidan xabar yuborgan.
Shaxsiy yozishmalarda Jonson shahzoda bilan Angliyaning “Nyukasl Yunayted” futbol klubini sotish bo‘yicha kelishuvni muhokama qilgani taxmin qilinmoqda, Dayson esa o‘z kompaniyasi uchun soliq imtiyozlari to‘g‘risida bosh vazir bilan yozishmalar olib borgan.
“Shu tarzda Jonson 2019-yilda bo‘lib o‘tgan parlament saylovlaridan so‘ng hukumatda o‘zi tarqatgan tavsiyalarni buzdi”, — deb yozadi gazeta. O‘shanda u hukumat amaldorlariga telefon va elektron pochtaga buzib kirish xavfi haqida ogohlantiruvchi tavsiyalar bergandi. Ko‘rsatmalarga ko‘ra, siyosatchilar maxfiylik darajasidan qat’i nazar, biznes muammolarini muhokama qilish uchun shaxsiy elektron qurilmalar va dasturlardan foydalanmasligi kerak.
Aprel oyida BBC Jonsonning shaxsiy mobil telefoni raqami so‘nggi 15 yil mobaynida internetda mavjud bo‘lgani haqida xabar bergandi. Unga ko‘ra, bosh vazirning telefon raqami 2006-yilda, siyosatchi Britaniya parlamentining kabinetida oliy ta’lim vaziri bo‘lib ishlayotgan paytda chiqarilgan press-relizlardan birida ko‘rsatilgan. O‘shandan buyon press-reliz o‘chirilmagan va uni internetda topsa bo‘ladi.
Leyboristlar yetakchisi ser Kir Starmerning aytishicha, bu “xavfsizlikka tahdid soladigan jiddiy vaziyat”. Shu bilan birga, g‘aznachilik kansleri Rishi Sunak “barcha xavfsizlik qoidalariga rioya qilinganini” ta’kidladi.
Izoh (0)