Буюк Британия бош вазири Борис Жонсон шахсий телефонидан иш масалаларида фойдаланган, бу унинг ўз жамоаси томонидан берилган хавфсизлик бўйича махфий тавсияларига зид, деб ёзади The Times.
Нашр маълумотларига кўра, Жонсон Саудия Арабистони валиаҳд шаҳзодаси Муҳаммад бин Салмон ва тадбиркор Жеймс Дайсонга шахсий телефонидан хабар юборган.
Шахсий ёзишмаларда Жонсон шаҳзода билан Англиянинг «Ньюкасл Юнайтед» футбол клубини сотиш бўйича келишувни муҳокама қилгани тахмин қилинмоқда, Дайсон эса ўз компанияси учун солиқ имтиёзлари тўғрисида бош вазир билан ёзишмалар олиб борган.
«Шу тарзда Жонсон 2019 йилда бўлиб ўтган парламент сайловларидан сўнг ҳукуматда ўзи тарқатган тавсияларни бузди», — деб ёзади газета. Ўшанда у ҳукумат амалдорларига телефон ва электрон почтага бузиб кириш хавфи ҳақида огоҳлантирувчи тавсиялар берганди. Кўрсатмаларга кўра, сиёсатчилар махфийлик даражасидан қатъи назар, бизнес муаммоларини муҳокама қилиш учун шахсий электрон қурилмалар ва дастурлардан фойдаланмаслиги керак.
Апрель ойида BBC Жонсоннинг шахсий мобил телефони рақами сўнгги 15 йил мобайнида интернетда мавжуд бўлгани ҳақида хабар берганди. Унга кўра, бош вазирнинг телефон рақами 2006 йилда, сиёсатчи Британия парламентининг кабинетида олий таълим вазири бўлиб ишлаётган пайтда чиқарилган пресс-релизлардан бирида кўрсатилган. Ўшандан буён пресс-релиз ўчирилмаган ва уни интернетда топса бўлади.
Лейбористлар етакчиси сер Кир Стармернинг айтишича, бу «хавфсизликка таҳдид соладиган жиддий вазият». Шу билан бирга, ғазначилик канцлери Риши Сунак «барча хавфсизлик қоидаларига риоя қилинганини» таъкидлади.
Изоҳ (0)