Afg‘onistonda Amerikaning havo hujumiga qarshi mudofaa tizimi Kobul aeroporti hududiga otilgan beshta raketani tutib oldi. Bu haqda Reuters AQSh rasmiy vakiliga tayanib xabar berdi.
Amaldorning so‘zlariga ko‘ra, raketalar 30-avgust kuni ertalab uchirilgan, ammo ularning barchasi havo hujumiga qarshi mudofaa tizimi tomonidan urib tushirilgani noaniq bo‘lib qolmoqda. Hozircha amerikalik harbiy xizmatchilar orasidagi talafot bo‘yicha ma’lumotlar yo‘q, deya qo‘shib qo‘ydi u.
CNN’ning manbasi, yana bir amerikalik mansabdorning fikricha, hujum ortida IShIDning Afg‘onistondagi bo‘linmasi turibdi, ammo hozircha buni aniq aytib bo‘lmaydi.
26-avgust kuni Kobul aeroporti yaqinida bir nechta portlash sodir bo‘ldi, oqibatda 200 dan ortiq odam, shu jumladan, 13 nafar amerikalik harbiy halok bo‘lgandi. IShID terakt uchun javobgarlikni o‘z zimmasiga oldi. AQSh prezidenti Jo Bayden terrorchilarning yetakchilari va obyektlariga zarbalar berishga tayyorlanishni buyurdi.
28-avgustga o‘tar kechasi AQSh Afg‘oniston sharqidagi Nangarhor viloyatida dron yordamida aviazarba uyushtirdi. Birlashgan shtabning mintaqaviy operatsiyalar va kuchlarni boshqarish bo‘yicha direktori o‘rinbosari general-mayor Uilyam Teylor operatsiya natijasida IShIDning ikki yetakchisi yo‘q qilinganini ma’lum qildi.
Aeroport yaqinidagi teraktdan keyin Jo Bayden Kobulda terrorchilarning yangi hujumlari ehtimoli haqida ogohlantirdi. 28-avgust kuni Amerika prezidenti AQSh qo‘mondonligi ma’lumotlariga tayanib, yaqin 24—36 soat ichida yangi hujum yuz berishini ma’lum qilgandi.
29-avgust kuni esa Amerika droni, Pentagon ma’lumotlariga ko‘ra, mina joylashtirilgan avtomobilni nishonga oldi. AQSh harbiylariga qaraganda, mashinani IShID jangarilari qoldirgan. Dron orqali berilgan zarba oqibatida Kobulda to‘qqiz kishi, shu jumladan, olti nafar bola halok bo‘ldi.
Shu kuni Kobul aeroporti yaqinida yana bir portlash yuz berdi. Turar joyga raketa kelib tushdi, oqibatda ikki kishi halok bo‘lib, uch kishi yaralandi. Afg‘oniston politsiyasi ma’lumotlariga ko‘ra, raketa Kobul aeroporti atrofiga kelib tushgan, bir bola halok bo‘lgan.
Izoh (0)