30-avgust kuni Tojikiston prezidenti Emomali Rahmon respublika Oliy Majlisining Vakillar palatasi (parlament quyi palatasi)ga “Amnistiya to‘g‘risida”gi qonun loyihasini ko‘rib chiqish uchun yubordi. Bu haqda Asia-Plus xabar berdi.
Shu munosabat bilan, Tojikiston prezidenti 6-sentabr kuni mamlakat parlament quyi palatasining navbatdan tashqari sessiyasini chaqiradi.
Dastlabki ma’lumotlarga ko‘ra, yangi amnistiya qonuni 16 ming kishini qamrab oladi, shundan 10 700 kishi jinoiy javobgarlikdan va jazo o‘tashni davom ettirishdan ozod qilinadi. Jumladan, 800 nafar gumonlanuvchi va ayblanuvchi, 350 nafar sudlanuvchi, axloq tuzatish muassasalaridan 3 mingga yaqin, aholi punktlaridagi koloniyalardan 1900 va axloq tuzatish ishlari inspeksiyasidan 4650 mahkum ozod qilinmoqda. 5300 nafar mahkumning jazo muddati qisqartiriladi.
Qonun loyihasi quyidagi shaxslarni jinoiy javobgarlikdan va jazoni o‘tashdan butunlay ozod qiladi: ehtiyotsizlik oqibatida jinoyat sodir etgan; jazoni ijro etish to‘xtatilgan; jazo shartli qo‘llanilmasdan, axloq tuzatish koloniyasi turar joyida jazo o‘tayotgan; shartli ravishda muddatidan oldin ozod qilingan; ozodlikdan mahrum qilish bilan bog‘liq bo‘lmagan boshqa jazoga hukm qilingan; iqtisodiy xususiyatga ega jinoyatlar uchun hukm qilingan va yetkazilgan moddiy zararni to‘liq qoplagan shaxslar.
Qonun loyihasida ayollar, voyaga yetmaganlar, 55 yoshdan oshgan shaxslar, nogironlar, og‘ir kasallar, davlat mukofotlariga ega bo‘lgan kishilar, urush qatnashchilari va ularga tenglashtirilgan shaxslar, shuningdek chet el fuqarolari birinchi o‘ringa qo‘yilgan.
Agar yuqoridagilar sodir etgan jinoyatlar “Amnistiya to‘g‘risida”gi qonun tomonidan cheklangan jinoyatlarga taalluqli bo‘lmasa, ular jinoiy javobgarlikdan va jazoni o‘tashdan ozod qilinadi.
O‘zbekistonda Shavkat Mirziyoyev 27-avgust kuni “Jazo muddatini o‘tayotgan, qilmishiga chin ko‘ngildan pushaymon bo‘lgan va tuzalish yo‘liga qat’iy o‘tgan bir guruh shaxslarni afv etish to‘g‘risida”gi farmonni imzoladi. Farmon Mustaqillik bayrami arafasida davlat tomonidan olib borilayotgan insonparvarlik siyosatining amaliy tasdig‘i sifatida qabul qilingan. Unga muvofiq, 215 nafar shaxs afv etilgan.
Bundan avval Shavkat Mirziyoyev Ramazon hayiti munosabati bilan 100 nafar hamda Navro‘z bayrami arafasida 140 nafar mahkumni afv etgan edi.
Izoh (0)