Ijtimoiy tarmoqlarda AQSh prezidenti Jo Bayden Isroil bosh vaziri Naftali Bennet bilan uchrashuvda go‘yoki uxlab qolgani aks etgan video tarqaldi, holat Amerika Kongressining bir nechta vakillarini g‘azablantirgan, deb yozadi International Business Times.
“Bu video ijtimoiy tarmoqlarda keng tarqaldi. Baydenni uchrashuv davomida uxlab o‘tirganlikda ayblaganlar orasida respublikachi kongressvumanlar — koloradolik Loren Bobert, jorjiyalik Marjori Teylor Grin ham bor”, — deb yozadi nashr.
“Uyg‘on, Jo. Sen iste’foga chiqish to‘g‘risidagi arizaga imzo qo‘yishing kerak”, — deb yozgan Bobert Twitter’da.
“Jo Baydenni zudlik bilan olib tashlang. Mamlakatimiz Isroil bosh vaziri bilan uchrashuvda hushyor tura olmaydigan odamning nazoratida bo‘lishi uni xavf ostida qoldiradi”, — deya video ostiga izoh qoldirdi Teylor Grin Twitter’da.
Videoda Bennet Baydenga “AQSh—Isroil munosabatlarining yangi sahifasi” haqida gapirar ekan, AQSh prezidenti boshini egib, qo‘llarini qorni ustida qovushtirib, deyarli harakatsiz o‘tirganini ko‘rish mumkin. Bir payt Bennet Bayden uni tinglamayotganini tushungan va nutqini prezidentga murojaat qilmasdan davom ettirgan.
Eslatib o‘tamiz, Isroilda Naftali Bennet boshchiligidagi yangi hukumat o‘z ishini 14-iyundan boshlagan. 27-avgust kuni Bennet va Bayden birinchi marta uchrashuv o‘tkazdi. Dastlab Afg‘onistondagi teraktlar tufayli uchrashuv bir kunga qoldirilgandi.
Avvalroq, 16-iyun kuni Jenevada bo‘lib o‘tgan Jo Bayden va Rossiya prezidenti Vladimir Putinning yuzma-yuz uchrashuvi oldidan AQSh sobiq prezidenti Donald Tramp Baydenga uchrashuvda uxlab qolmaslikni tilagan. Saylovoldi tashviqoti paytida Tramp bir necha bor Baydenni “uyquchi Jo” deb atagan, shuningdek, uning ruhiy tanazzul holatida ekanini ta’kidlagan.
Shuningdek, Putin bilan uchrashuvidan so‘ng Bayden “global auditoriya qarshisida ojiz” deb ta’riflangandi.
Izoh (0)