Internetda Qashqadaryo viloyatining olis qishloqlaridan birida yashovchi oilaning erta-indin to‘kilib tushish darajasiga yetgan kulbasi tasvirlangan surat tarqalib, ko‘plab muhokamalarni keltirib chiqardi. Bu haqda Facebook’da yozgan muallif kinoya bilan bu Afg‘oniston emas, O‘zbekiston degan bo‘lsa, Twitter’dagi muallif shunchaki dahshat, deya ta’riflagan.
“Daryo” muxbiri suratdagi fuqarolarni izlab, Qashqadaryo viloyatining Dehqonobod tumani markazidan salkam 200 kilometr uzoqlikda joylashgan Oqzov qishlog‘ida bo‘ldi.
Ma’lum bo‘lishicha, suratda sovg‘a ko‘tarib turgani ko‘ringan qizlar va keksa otaxon Dehqonobod tumanining “Oybek” mahalla fuqarolar yig‘iniga qarashli Oqzov qishlog‘ida yashovchi Safar bobo To‘raqulov va uning ikki nafar qizi — Jumagul va Jamila bo‘lgan.
Suhbat davomida aniq bo‘lishicha, Safar bobo To‘raqulov ayni kunda 93 yoshni qarshi olgan. Turmush o‘rtog‘i Uldono momo Qo‘ziyeva 2000-yilda vafot etgan.
Safar bobo va Uldono momoning 3 nafar farzandi bor.
Taqdir taqozosi bilan Safar boboning 1993-yil va 1995-yilda tug‘ilgan qizlari, shuningdek, 1997-yilda tug‘ilgan o‘g‘li aqliy nosog‘lom bo‘lib, ularni ham voyaga yetkazish gapirish va eshitishda imkoniyati cheklangan otaxon zimmasida bo‘lgan.
Safar boboning jiyani 50 yoshli Alisher Imomovning aytishicha, tog‘asi Safar boboning tug‘ilganidan buyon nutqida nuqson bor. Eshitish qobiliyati bo‘lmagan. Maktabda tahsil olmagan, savodi yo‘q.
“Tog‘am 93 yoshga kirgan bo‘lsa-da, shu yoshgacha eshitmaydi, gapirolmaydi. Taqdir taqozosini qarangki, tog‘amning uch nafar farzandi ham aqliy zaif bo‘lib tug‘ildi. Biroq nolimaymiz, to‘rt muchasi sog‘. Imkon qadar hayot kechirishmoqda”, — deydi Alisher Imomov.
Kasbi o‘qituvchilik bo‘lgan Alisher Imomov oyiga nari borsa 500 ming so‘m nafaqa evaziga tirikchilik qilib kelayotgan Safar bobo va uning uch nafar farzandiga qo‘lidan kelgancha g‘amxo‘rlik qiladi. Biroq oila uchun bu yetarli emas. Shunga qaramasdan oila shukronalik bilan yashamoqda.
“Safar boboning turmush o‘rtog‘i 2000-yil vafot etgan. Tog‘am endigina 7 yosh, 5 yosh va 3 yoshga to‘lgan farzandlarini odamlarning molini boqib, og‘ir yumushini bajarib boqdi”, — Alisher Imomov.
“Daryo” muxbiri bilan suhbatda bo‘lgan Eshmamat Ko‘charov Safar bobo bilan qo‘shni bo‘lib yashashini, bobo va uning oilasini 40 yildan beri tanishini aytib, oilaga ko‘mak zarurligini aytdi.
“Safar bobo bizga yon qo‘shni. Hozir 51 yoshda bo‘lsam, boboni 41 yildan beri yaxshi taniyman. Mendan eshitsangiz, bobo nogiron. Oyoq-qo‘li butun, yuradi. Non yeydi, choy ichadi. Ammo gapirolmaydi. Eshitmaydi. Farzandlari ham ruhiy nosog‘lom. To‘rt muchasi sog‘, ammo aqliy qobiliyati yo‘q”, — deydi Oqzov qishlog‘ida yashovchi Eshmamat Ko‘charov.
Ushbu qishloqda bo‘lgan “Daryo” muxbiri qishloq aholisining turmush tarzi, tirikchiligi bilan ham qiziqdi.
Eshmamat Ko‘charov qishlog‘i so‘lim va o‘ziga yoqishini, biror marta ham qishloqni tashlab shaharga ko‘chib ketish, shaharda yashash ishtiyoqi tug‘ilmaganini aytar ekan, “qishloqdoshlarimiz asosan chorvachilik bilan, qolaversa, dehqonchilik bilan tirikchilik qiladi, shukrki, Yaratgan rizqimizni kam qilmagan”, deydi.
“Qishlog‘imdan ketish haqida hech o‘ylab ko‘rmagan ekanman. Men uchun shu joy, shu qishloq, shu manzara qadrdon. Va hech qachon qishlog‘imni tashlab, shaharga ketish ishtiyoqi ham bo‘lmagan”, — deydi suhbatdosh.
Oqzov qishlog‘i joylashgan “Oybek” mahalla fuqarolar yig‘ini raisi Hayitmurod Ismoilovning ma’lumot berishicha, 7 ta qishloqdan iborat MFYda 630 ta xonadon va ushbu xonadonlarda 3250 nafar aholi istiqomat qiladi.
“Oqzov qishlog‘ida esa 20 ta xo‘jalik istiqomat qiladi”, — deydi rais Hayitmurod Ismoilov.
“Daryo” muxbiri so‘roviga javoban Dehqonobod tumani hokimi Zoir Aliqulov 15-avgust, yakshanba dam olish kuni bo‘lishiga qaramasdan otaxon yashayotgan qishloqqa, Safar bobo xonadoniga bordi. Va otaxonga yangi uy qurib berilishini, aqliy zaif bo‘lgan farzandlari uchun nogironlik nafaqasi tayinlanishini ma’lum qildi.
“Daryo” muxbirining aniqlashtirishicha, viloyatda tuman markazidan uzoqda joylashgan va aholi uchun tuman markaziga borib kelish muammo tug‘dirishi mumkin bo‘lgan qishloqlar soni ko‘p.
Jumladan, Dehqonobod tumanining “Oybek” mahalla fuqarolar yig‘ini hududidagi qishloqlar — Oqzov, Oqqishloq, Kon, Qorabotir qishloqlari, “Sarchashma” mahalla fuqarolar yig‘iniga qarashli Duob, Boshchorbog‘, Chilgaz qishloqlari, Shahrisabz tumanidagi Ko‘l, G‘elon qishloqlari, Yakkabog‘ tumanining Vori, Zarmast, Guldara, Daryo qishloqlari, Chiroqchi tumanining Tarag‘ay, Langar qishloqlari tumanlar markazidan uzoq va olisda joylashgan qishloqlar hisoblanadi.
Avvalroq “Daryo” ana shunday qishloqlarda yashovchi aholi muammolarini, tuman markaziga borib-kelishdagi mashaqqatlar va ob-havo noqulay paytlarda ushbu qishloq aholisining tuman markazidan uzilib qolishi haqida so‘z yuritgan.
Izoh (0)