O‘zbekistonda 21-avgust kuni “Yangi O‘zbekistonda erkin va farovon yashaylik” shiori ostida umumxalq xayriya hashari o‘tkazilgandi. Mahalla va oilani qo‘llab-quvvatlash vazirligi ushbu hashar davomida amalga oshirilgan ishlar haqida ma’lumot berdi.
Unga ko‘ra, mamlakat mahallalari bo‘ylab o‘tkazilgan umumxalq xayriya hashari davomida quyidagi ishlar amalga oshirildi:
- 14 ming 71 gektardan ortiq maydonlar obodonlashtirildi va sanitar tozalandi;
- 12 ming 60 tonnadan ziyod chiqindilar chiqarib tashlandi;
- 12 ming 419 kilometr uzunlikdagi ariq va lotoklar tozalandi;
- 9 ming 287 ta qabriston va 711 ta ziyoratgohlar obodonlashtirilib, tartibga keltirildi;
- 5 million 250 mingdan ziyod daraxtlar oqlanib, ularga shakl berildi.
- Qayd etilishicha, ushbu tadbirlarni amalga oshirish uchun 8 ming 460 ta texnika vositalari jalb etildi.
- 5 ming 947 ta kam ta’minlangan oilalarning 168 ming metr kvadrat dan ziyod uy-joylari hashar yo‘li bilan ta’mirlandi;
- 10 ming 297 nafar ehtiyojmand oilalarga, shundan 3456 nafar nogiron va yolg‘iz qariyalarning holidan xabar olinib, ularga moddiy yordam ko‘rsatildi.
Bundan tashqari, hashar kuni mahallalarda 141 ta savdo va maishiy xizmat ko‘rsatish va boshqa obyektlar, shundan 22 ta maishiy xizmat ko‘rsatish shoxobchalari (go‘zallik saloni, sartaroshxona, kutubxona, dorixona, novvoyxona, nuroniylar markazi va boshqalar) 25 ta savdo obyektlari, 9 ta ishlab chiqarish sexi, 34 ta mahalla binosi, 7 ta bolalar sport maydonchalari, 44 ta boshqa obyektlar foydalanishga topshirildi.
O‘tkazilgan umumxalq xayriya hasharida 9 million 700 mingdan ziyod fuqaro (shundan 5 million 664 ming nafardan ortiq yoshlar) ishtirok etdi.
Xabarda ta’kidlanishicha, avgust oyi davomida mamlakatning barcha hududlarida obodonlashtirish va tozalik oyligi tasdiqlangan reja asosida kam ta’minlangan oilalar, yolg‘iz qariyalar, nogironlar holidan xabar olish, moddiy va ma’naviy yordam ko‘rsatish, shuningdek, yangi mahalla binosi, guzarlari va bolalar maydonchalarini qurish va ta’mirlash ishlari bilan davom etadi.
Eslatib o‘tamiz, O‘zbekistonda bundan avvalgi umumxalq xayriya hashari 13-mart kuni o‘tkazilgandi. Unda kam ta’minlangan oilalarni moddiy va ma’naviy qo‘llab-quvvatlash ko‘zda tutilmagandi.
Izoh (0)