Dehqonobod tumani hokimligi Zoir Mirzayev va’dasini bajarmayotgani haqidagi maqolaga munosabat bildirdi

Dehqonobod tumani hokimligi “Daryo”da e’lon qilingan maqolaga munosabat bildirib, vaziyat viloyat hokimi nazoratida ekanini ma’lum qildi.

Hokimlik axborot xizmatining qayd etishicha, viloyat hokimi topshirig‘iga ko‘ra maqola yuzasidan o‘rganish olib borilgan.

“‘Daryo.uz’ saytida ‘Qashqadaryolik tadbirkor viloyat hokimi Zoir Mirzayev va’dasini bajarmayotganini aytmoqda’ sarlavhali maqola e’lon qilingan bo‘lib, unda dehqonobodlik tadbirkor Bekzod Berdiyevning muammosi tilga olingandi. Maqolada tadbirkor viloyat hokimi Zoir Mirzayev tumanning Boyqo‘rg‘on qishlog‘idagi bozor muammosiga yetarlicha e’tibor qaratmayotganini, shuningdek, 2019-yil 31-dekabrdagi kelishuvga ko‘ra bozor egaligi sotuvga qo‘yilmayotganini aytib, shikoyat qilgandi. Mazkur masala omma e’tiboriga havola qilingach, viloyat hokimi topshirig‘iga ko‘ra, 2021-yilning 21-avgust kuni viloyat hokimligi mas’ullaridan iborat ishchi guruh tomonidan o‘rganib chiqildi”, — deyiladi hokimlik rasmiy munosabatida.

Qayd etilishicha, viloyat rahbari 2019-yil 31-dekabr kuni bozorda bo‘lib, qishloqdagi har ikkala bozor — “Boyqo‘rg‘on bekligi” va “Tursunxon—Bibizulayho” dehqon oziq-ovqat bozorlari talabga javob bermasligini ma’lum qilib, viloyat hokimligi homiyligi asosida bozor qayta ta’mirlanishini ma’lum qilgan. Hokim va’dasiga ko‘ra, bozor 115 million so‘m homiylik asosidagi mablag‘ evaziga qayta ta’mirlanib, yangi chiroy kasb etgan. Ammo shu paytga qadar bozor egaligi sotuvga qo‘yilmagan.

Ta’kidlanishicha, ishchi guruh xulosasiga ko‘ra, mazkur masala yuzasidan tez orada yakuniy qarorga kelinadi.