Toshkentning Chilonzor tumanida 27 yoshli yigit pul sababli kar-soqov qizni kaltaklagani haqida xabar berilgan edi. Poytaxt IIBB matbuot xizmati ushbu yigit tergovdan qochib yashiringani uchun qidiruvga berilganini e’lon qildi.
Qayd etilishicha, imkoniyati cheklangan qiz va yigit o‘rtasidagi janjal yuzasidan Chilonzor tumani IIO FMB Tergov bo‘limi tomonidan 1994-yilda tug‘ilgan O‘tkirjon Xolmatovga nisbatan Jinoyat kodeksining 277-moddasi (bezorilik) alomatlari bilan jinoyat ishi qo‘zg‘atildi.
Ushbu yigit jinoyat ishi doirasida o‘tkazilayotgan tergov-tezkor harakatlaridan qochib yashiringan. Shu sababli unga qidiruv e’lon qilingan.
“Hurmatli fuqarolar! Agarda siz suratdagi O‘tkirjon Xolmatovni qayerdaligini bilsangiz yoki u haqida biror ma’lumotga ega bo’lsangiz, 71-281-92-54, 71-281-94-37, 97-449-02-11, 98-337-72-22 raqamlari orqali xabar berishingizni so’raymiz. Maxfiylik kafolatlanadi”, — deya ta’kidlangan IIBB xabarida.
Eslatib o‘tamiz, imkoniyati cheklangan 22 yoshli qiz va 27 yoshli yigit o‘rtasida janjal 20-avgust kuni soat 08:00 da Chilonzor tumani “Sharq” mahallasi hududida kelib chiqqan. Ijtimoiy tarmoqlarda holat aks etgan video ham taqaldi. Unda yigit qizni urayotganini ko‘rish mumkin.
Poytaxt IIBB badan shikastlari og‘irligi darajasini aniqlash maqsadida sud tibbiy ekspertizasi tayinlanganini, tergovoldi tekshiruvi natijalariga ko‘ra zarur choralar ko‘rilishini ma’lum qilgan.
Izoh (0)