Интернетда Қашқадарё вилоятининг олис қишлоқларидан бирида яшовчи оиланинг эрта-индин тўкилиб тушиш даражасига етган кулбаси тасвирланган сурат тарқалиб, кўплаб муҳокамаларни келтириб чиқарди. Бу ҳақда Facebook’да ёзган муаллиф киноя билан бу Афғонистон эмас, Ўзбекистон деган бўлса, Twitter’даги муаллиф шунчаки даҳшат, дея таърифлаган.
«Дарё» мухбири суратдаги фуқароларни излаб, Қашқадарё вилоятининг Деҳқонобод тумани марказидан салкам 200 километр узоқликда жойлашган Оқзов қишлоғида бўлди.
Маълум бўлишича, суратда совға кўтариб тургани кўринган қизлар ва кекса отахон Деҳқонобод туманининг «Ойбек» маҳалла фуқаролар йиғинига қарашли Оқзов қишлоғида яшовчи Сафар бобо Тўрақулов ва унинг икки нафар қизи — Жумагул ва Жамила бўлган.
Суҳбат давомида аниқ бўлишича, Сафар бобо Тўрақулов айни кунда 93 ёшни қарши олган. Турмуш ўртоғи Улдоно момо Қўзиева 2000 йилда вафот этган.
Сафар бобо ва Улдоно момонинг 3 нафар фарзанди бор.
Тақдир тақозоси билан Сафар бобонинг 1993 йил ва 1995 йилда туғилган қизлари, шунингдек, 1997 йилда туғилган ўғли ақлий носоғлом бўлиб, уларни ҳам вояга етказиш гапириш ва эшитишда имконияти чекланган отахон зиммасида бўлган.
Сафар бобонинг жияни 50 ёшли Алишер Имомовнинг айтишича, тоғаси Сафар бобонинг туғилганидан буён нутқида нуқсон бор. Эшитиш қобилияти бўлмаган. Мактабда таҳсил олмаган, саводи йўқ.
«Тоғам 93 ёшга кирган бўлса-да, шу ёшгача эшитмайди, гапиролмайди. Тақдир тақозосини қарангки, тоғамнинг уч нафар фарзанди ҳам ақлий заиф бўлиб туғилди. Бироқ нолимаймиз, тўрт мучаси соғ. Имкон қадар ҳаёт кечиришмоқда», — дейди Алишер Имомов.
Касби ўқитувчилик бўлган Алишер Имомов ойига нари борса 500 минг сўм нафақа эвазига тирикчилик қилиб келаётган Сафар бобо ва унинг уч нафар фарзандига қўлидан келганча ғамхўрлик қилади. Бироқ оила учун бу етарли эмас. Шунга қарамасдан оила шукроналик билан яшамоқда.
«Сафар бобонинг турмуш ўртоғи 2000 йил вафот этган. Тоғам эндигина 7 ёш, 5 ёш ва 3 ёшга тўлган фарзандларини одамларнинг молини боқиб, оғир юмушини бажариб боқди», — Алишер Имомов.
«Дарё» мухбири билан суҳбатда бўлган Эшмамат Кўчаров Сафар бобо билан қўшни бўлиб яшашини, бобо ва унинг оиласини 40 йилдан бери танишини айтиб, оилага кўмак зарурлигини айтди.
«Сафар бобо бизга ён қўшни. Ҳозир 51 ёшда бўлсам, бобони 41 йилдан бери яхши танийман. Мендан эшитсангиз, бобо ногирон. Оёқ-қўли бутун, юради. Нон ейди, чой ичади. Аммо гапиролмайди. Эшитмайди. Фарзандлари ҳам руҳий носоғлом. Тўрт мучаси соғ, аммо ақлий қобилияти йўқ», — дейди Оқзов қишлоғида яшовчи Эшмамат Кўчаров.
Ушбу қишлоқда бўлган «Дарё» мухбири қишлоқ аҳолисининг турмуш тарзи, тирикчилиги билан ҳам қизиқди.
Эшмамат Кўчаров қишлоғи сўлим ва ўзига ёқишини, бирор марта ҳам қишлоқни ташлаб шаҳарга кўчиб кетиш, шаҳарда яшаш иштиёқи туғилмаганини айтар экан, «қишлоқдошларимиз асосан чорвачилик билан, қолаверса, деҳқончилик билан тирикчилик қилади, шукрки, Яратган ризқимизни кам қилмаган», дейди.
«Қишлоғимдан кетиш ҳақида ҳеч ўйлаб кўрмаган эканман. Мен учун шу жой, шу қишлоқ, шу манзара қадрдон. Ва ҳеч қачон қишлоғимни ташлаб, шаҳарга кетиш иштиёқи ҳам бўлмаган», — дейди суҳбатдош.
Оқзов қишлоғи жойлашган «Ойбек» маҳалла фуқаролар йиғини раиси Ҳайитмурод Исмоиловнинг маълумот беришича, 7 та қишлоқдан иборат МФЙда 630 та хонадон ва ушбу хонадонларда 3250 нафар аҳоли истиқомат қилади.
«Оқзов қишлоғида эса 20 та хўжалик истиқомат қилади», — дейди раис Ҳайитмурод Исмоилов.
«Дарё» мухбири сўровига жавобан Деҳқонобод тумани ҳокими Зоир Алиқулов 15 август, якшанба дам олиш куни бўлишига қарамасдан отахон яшаётган қишлоққа, Сафар бобо хонадонига борди. Ва отахонга янги уй қуриб берилишини, ақлий заиф бўлган фарзандлари учун ногиронлик нафақаси тайинланишини маълум қилди.
«Дарё» мухбирининг аниқлаштиришича, вилоятда туман марказидан узоқда жойлашган ва аҳоли учун туман марказига бориб келиш муаммо туғдириши мумкин бўлган қишлоқлар сони кўп.
Жумладан, Деҳқонобод туманининг «Ойбек» маҳалла фуқаролар йиғини ҳудудидаги қишлоқлар — Оқзов, Оққишлоқ, Кон, Қоработир қишлоқлари, «Сарчашма» маҳалла фуқаролар йиғинига қарашли Дуоб, Бошчорбоғ, Чилгаз қишлоқлари, Шаҳрисабз туманидаги Кўл, Ғэлон қишлоқлари, Яккабоғ туманининг Вори, Зармаст, Гулдара, Дарё қишлоқлари, Чироқчи туманининг Тарағай, Лангар қишлоқлари туманлар марказидан узоқ ва олисда жойлашган қишлоқлар ҳисобланади.
Аввалроқ «Дарё» ана шундай қишлоқларда яшовчи аҳоли муаммоларини, туман марказига бориб-келишдаги машаққатлар ва об-ҳаво ноқулай пайтларда ушбу қишлоқ аҳолисининг туман марказидан узилиб қолиши ҳақида сўз юритган.
Изоҳ (0)