Bugun,

  • USD 11095.31
  • RUB 173.84
  • EUR 10772.44

Qashqadaryo viloyatining Dehqonobod tumanida yashovchi tadbirkor Bekzod Berdiyev viloyat hokimi Zoir Mirzayev 2019-yil 31-dekabr kuni bergan va’dasini bajarmayotganini aytmoqda. Bu haqda “Daryo” tahririyatiga shikoyat qilgan tadbirkor viloyat hokimi tomonidan berilgan va’da — Dehqonobod tumanining Boyqo‘rg‘on qishlog‘ida qayta qurilgan bozorning egalik huquqi sotuvga qo‘yilishi haqidagi gap gapligicha qolayotganini aytdi.

Bekzod Berdiyev.

Bekzod Berdiyev.
Foto: “Daryo”

“Qishlog‘imizdagi bozor muammosi saytda yoritilgach, 2019-yil 31-dekabr kuni viloyat hokimi Zoir Mirzayev Dehqonobod tumaniga borgandi. Hokim qishloqda men rahbarlik qilayotgan ‘Boyqo‘rg‘on bekligi’ dehqon oziq-ovqat bozorini, shuningdek bizga raqobatchi ‘Tursunxon Bibizulayho’ dehqon oziq-ovqat bozorida yaratilgan shart-sharoitni ko‘rib, har ikkala bozordan ham qoniqmaganini, qishloq aholisi uchun yangi bozor qurilishi lozimligini aytgandi. Shundan so‘ng, viloyat hokimligi va tuman hokimligi tomonidan qurilish materiallari berilib, hashar yo‘li bilan bozor qayta qurildi. Ammo bir yildan beri sotuvga qo‘yilmayapti. Bozorga bizga raqobatchi bo‘lgan tadbirkor egalik qilmoqda”, — deydi dehqonobodlik tadbirkor Bekzod Berdiyev.

Bekzod Berdiyevning aytishicha, viloyat hokimi Zoir Mirzayev bozor qayta qurilgach, sotuvga qo‘yilishini, kim sotib olsa bozorga o‘sha tadbirkor rahbarlik qilishini aytgan.

“Bu haqda Dehqonobod tuman hokimligining rasmiy saytida ham ma’lumot berilgan. Qolaversa, ‘Daryo’ saytida ham yoritilgan. Ammo aytilgan va’da va’daligicha qolib ketmoqda”, — deydi tadbirkor.

Tadbirkorning ma’lumot berishicha, u viloyat rahbari Zoir Mirzayevga va’dasini eslatib, adolatli qaror chiqarishini so‘rash uchun hokim qabuliga borgan. Ammo viloyat hokimi qabuliga kirolmagan.

“Viloyat hokimi Zoir Mirzayev qabuliga kirishni so‘rab, Zoir Mirzayevning tadbirkorlar murojaati uchun tashkil qilingan Telegram'dagi manziliga ham xabar yubordim. Shuningdek, Suhrob ismli mas’ul bilan ham gaplashdim. Lekin natija chiqmadi”, — deydi adolat izlayotganini aytgan Bekzod Berdiyev.

Tadbirkorning qo‘shimcha axborot berishicha, u so‘ngra Dehqonobod tumani hokimi Zoir Aliqulov qabulida bo‘lgan.

“Meni va ayni kunda bozorga rahbarlik qilayotgan tadbirkorlarni qabuliga chaqirgan Dehqonobod tumani hokimi Zoir Aliqulov bozor tez kunda sotuvga qo‘yilishini, bozorni munosib nomzod sotib olishi mumkinligini aytdi. Ammo aynan qachon sotuvga qo‘yilishini aniq aytmadi. So‘rasam, kutib turing degan javobni olyapman. Men shundoq ham bir yildan ortiq kutdim”, — deydi “Daryo” tahririyatidan najot so‘rab kelgan tadbirkor.

Dehqonobod tuman hokimligi axborot xizmati tomonidan e’lon qilingan munosabatda tadbirkor Bekzod Berdiyev shikoyat qilayotgan muammo viloyat hokimi Zoir Mirzayev hamda tuman rahbari Zoir Aliqulov nazoratiga olingani aytiladi. Ta‘kidlanishicha, muammo tez orada yechim topadi.

“Tadbirkor viloyat hokimiga murojaatida 2019-yil 31-dekabr kungi kelishuvga ko‘ra bozor uchun yangi joy qurilganini, qurilish uchun barcha qurilish materiallari hokimlik tomonidan berilganini, bozor esa hashar yo‘li bilan qayta qurilganini aytib, bozorqo‘mlikka besh nafar nomzod qo‘yilishi va bozor egaligi sotuvga chiqarilishini so‘ragan. Mazkur masala viloyat hokimi topshirig‘iga ko‘ra, tuman hokimi e’tiboriga olindi. Kecha hokim Zoir Aliqulov tadbirkorlar bilan muloqot qilib, muammo tez orada adolatli yechim topishini ma’lum qildi”, — deyiladi bu haqda rasmiy axborot bergan hokimlik.

Eslatib o‘tamiz, “Daryo”da e’lon qilingan “‘Odam yollab tadbirkorni turolmaydigan qilib kaltaklash buyurildi’. Dehqonobodda tadbirkorlar o‘rtasida mojaro kelib chiqdi”, sarlavhali maqolaga munosabat bildirgan viloyat rahbari Zoir Mirzayev Dehqonobod tumanidagi bozorlar faoliyati bilan tanishib, “Dehqonobodda bunday bozor borligi qashqadaryoliklar uchun uyat”, degandi. Hamda muammo yechimi sifatida bir-biri bilan tortishayotgan har ikkala bozor faoliyati ham tugatilib, qishloq aholisi uchun yangi bozor qurilishi hamda bozorning egalik huquqi sotilishini ma’lum qilgandi.

Izoh
Asosiy yangiliklar
Dunyo
Turkiya va Suriyadagi zilzila nega halokatli oqibatlarga olib keldi?
Mahalliy
“Qardoshlarimizga hamdardmiz”. O‘zbek jamoatchiligi Turkiyadagi zilzilaga munosabat bildirdi
Mahalliy
Shavkat Mirziyoyev harbiy xizmatga navbatdagi chaqiruv bo‘yicha qarorni imzoladi