Qirg‘iziston poytaxti Bishkekdagi BMT binosi oldida o‘nlab afg‘onistonlik qochqinlar 18-avgust kuni norozilik namoyishi o‘tkazib, ularga Qirg‘iziston fuqaroligi berilishini yoki bo‘lmasa, ularni AQSh yo Kanadaga yuborishni talab qildi.
“Biz Qirg‘izistonda qochqinlar guvohnomasi bilan yashayapmiz, bu hujjat bilan ishga joylashish qiyin. Yo bizga Qirg‘iziston fuqaroligi berilsin yo bizni Kanada yoki Amerikaga yuborishsin”, — deydi piket ishtirokchisi Ali Sarvar Muhammad Nabi.
Uning so‘zlariga ko‘ra, Afg‘onistondan kelgan ba’zi qochqinlar Qirg‘izistonda 18-20 yildan beri yashab kelmoqda, lekin ularga tegishli hujjatlar berilmayapti. Shuningdek, BMTdan hech kim ularning yoniga kelmagan, ishonch telefoni orqali savollarga javob olishning ham iloji bo‘lmagan.
“Eshitishimizcha, Afg‘onistondagi tartibsizliklar tufayli ko‘plab fuqarolar hozir AQSh yoki Kanadaga yuborilmoqda, bizni ham u yerga yuborishlarini istaymiz”, — deb talab qilmoqda namoyishchilar.
Namoyishchilar Qirg‘izistondagi AQSh elchixonasi oldida piketni davom ettirishga va’da bermoqda.
Avvalroq Kobulda ayollar norozilik namoyishi o‘tkazgani, “Tolibon” Nangarhorda namoyishchilarni o‘qqa tutgani haqida xabar berilgandi.
Mavzuga doir:
- Britaniya elchisi Lori Bristou “Tolibon” g‘alabasidan so‘ng Afg‘onistonni tark etishi kerak edi. Ammo u qoldi va shaxsan o‘zi Kobul aeroportida afg‘onlarga viza berdi
- Yuzlab odamlar Kobul aeroportida Afg‘onistondan uchib ketayotgan so‘nggi samolyotlarga chiqib olishga urindi. Bir necha kishi halok bo‘ldi (foto va video)
Izoh (0)