Afg‘oniston demokratik davlatga aylanmaydi, unda shariat qonunlari amal qiladi. Bu haqda “Tolibon”ning yuqori lavozimli a’zosi Vahidulla Hoshimiyga tayanib, “RBK” xabar berdi.
“Demokratik tizim umuman bo‘lmaydi, chunki bizning mamlakatimizda uning hech qanday poydevori yo‘q”, — dedi u. Hoshimiy, shuningdek, mamlakatda siyosiy tizim haqida hech qanday munozara o‘tkazilmasligini ta’kidladi, chunki u qanday bo‘lishi aniq va ravshan.
“Bu shariat qonunlari, vassalom”, — dedi “Tolibon” vakili.
Uning so‘zlariga ko‘ra, Afg‘onistonda hokimiyat tuzilmasi “Tolibon” hukmronligining avvalgi davri: 1996 —2001-yillardagi davlat tuzilishiga o‘xshash bo‘ladi.
20 yil oldin “Tolibon” hukmronligi davrida mamlakatda shariat qonunlariga qattiq tartibda rioya qilingan. Ayollarning pozitsiyasi eng qiyin bo‘lgan. Qizlar maktabga bora olmasdi, voyaga yetgan ayollarga esa paranjisiz va erkaklar hamrohligisiz uydan chiqishga ruxsat berilmagan. Qoidabuzarlarga jismoniy jazo yoki qatl tayinlanar edi. Avgust oyi boshida BMT “Tolibon” bosib olgan hududlarda ayollar, inson huquqlari himoyachilari va OAV xodimlarining ommaviy qatl qilinishi haqida hisobot berdi.
15-avgust kuni “Tolibon” Afg‘onistonning butun hududini o‘z nazoratiga olganini va hukumat kuchlari bilan qurolli to‘qnashuv tugaganini e’lon qildi. Shundan so‘ng “Tolibon” harakati birinchi marta matbuot anjumani o‘tkazdi.
“Mamlakatimiz musulmon mamlakati bo‘lgan va shunday bo‘lib qoladi, ammo 20 yil avvalgi holat bilan hozirgisi o‘rtasida katta farq bor. Biz avvalgiday ish ko‘rmaymiz”, — dedi harakat matbuot kotibi Zabixulla Mujohid.
Uning ma’lum qilishicha, “Tolibon” dunyo maydonida hech kim bilan dushmanlarcha munosabatda bo‘lishni istamaydi. Shuningdek, “Tolibon” ayollar huquqlariga shariat doirasida amal qilishga va’da berdi.
Matbuot anjumanidan ko‘p o‘tmasdan “Tolibon” harakatining a’zolari Nangarhorda namoyishchilarni o‘qqa tutgani haqida xabar berildi.
Izoh (0)