Erdo‘g‘on “Tolibon” bilan hamkorlik qilishga tayyorligini bildirdi

Turkiya “Tolibon” harakati vakillari bilan hamkorlik qilishga tayyor. Bu haqda mamlakat prezidenti Rajab Toyyib Erdo‘g‘on ma’lum qildi.

“Biz afg‘on xalqining tinchligini saqlash, bu mamlakatda yashayotgan turk fuqarolarining farovonligini ta’minlash, shuningdek, o‘z davlatimiz manfaatlarini himoya qilish uchun har qanday turdagi hamkorlikka tayyormiz”, — dedi Erdo‘g‘on.

“Bu mamlakatda hokimiyat tepasida kim bo‘lishidan qat’i nazar, Turkiya yaxshi kunda ham yomon kunda ham qardosh Afg‘onistonni qo‘llab-quvvatlaydi”, — dedi u.

Erdo‘g‘onning ta’kidlashicha, Turkiya “Tolibon”ning “mo‘tadil” bayonotlarini ma’qullaydi.

Turkiya prezidenti “Tolibon” yetakchilari bilan uchrashuv o‘tkazishga tayyorligini tasdiqladi. “Biz avvalroq ‘Tolibon’ rahbarlarini qabul qilishimiz mumkinligini aytgandik. Hali ham shu pozitsiyani saqlab turibmiz”,— dedi prezident Erdo‘g‘on.

Uning so‘zlariga ko‘ra, Turkiya harbiylarining Afg‘onistonda bo‘lib turishi bu mamlakat yangi ma’muriyatining xalqaro maydonda mavqeyini mustahkamlashga yordam berishi va uning ishini osonlashtirishi mumkin.

Erdo‘g‘onning ta’kidlashicha, Turkiya armiyasi hech qachon “Afg‘onistonda jangovar kuch” sifatida xizmat qilmagan. U, shuningdek, Kobul aeroportining xavfsizligini ta’minlashda Turkiyaning ishtiroki mavzusiga ham to‘xtaldi. Uning so‘zlariga ko‘ra, Anqara o‘z rejalarini “joylardagi yangi voqeliklarga” muvofiq qurmoqda. Turkiya vaziyatning rivojlanishiga asoslangan holda bu masala bo‘yicha muzokaralarni davom ettirmoqda.

Erdo‘g‘on Afg‘onistondagi Turkiya fuqarolarining “xavfsizligi va osoyishtaligini” ta’minlash Anqara uchun eng ustuvor vazifa ekanini ta’kidladi. Prezidentning aytishicha, ayni paytda Afg‘onistondan jami 522 nafar turkiyalik evakuatsiya qilingan.

Turkiya prezidenti shu hafta oxirida Germaniya kansleri Angela Merkel va Rossiya prezidenti Vladimir Putin bilan Afg‘onistondagi vaziyat bo‘yicha muzokaralar o‘tkazilishini e’lon qildi.

Avvalroq Britaniya mudofaa shtabi boshlig‘i Nikolas Karter “Tolibon”ga Afg‘onistonni boshqarishga ruxsat berish kerakligini aytgandi. Uning fikricha, “Tolibon”ning hozirgi a’zolari respublikani 90-yillarda bosib olganlaridan farq qilishi mumkin.

Britaniyalik general “sabrli bo‘lishni” va “Tolibon” hokimyatni qanday tasarruf etishini kuzatishni taklif qildi. Uning qo‘shimcha qilishicha, “Tolibon” “yana xalqaro maydonda ajratib qo‘yilishini xohlamasligi” aniq.

Shuningdek, Yevropa Ittifoqi “Tolibon”ning Afg‘onistondagi g‘alabasini tan oldi.