O‘zbekistonda 21-avgustda o‘tkaziladigan xayriya hasharida 5 mingdan ortiq fuqaro xonadonlari ta’mirlab beriladi

O‘zbekistonda 21-avgust kuni umumxalq xayriya hashari o‘tkazilishi haqida xabar berilgan edi. Hashar doirasida 5 mingdan ortiq fuqaro xonadonlari ta’mirlab beriladi. Bu haqda 19-avgust kuni Mahalla va oilani qo‘llab-quvvatlash vazirligi hamda “Mahalla” xayriya jamoat fondi mutasaddilari ishtirokida bo‘lib o‘tgan matbuot anjumanida ma’lum qilindi.

Qayd etilishicha, bu safargi xayriya hasharida kam ta’minlangan oilalarni moddiy va ma’naviy qo‘llab-quvvatlashga alohida e’tibor qaratiladi. Xususan, hashar doirasida 5 mingdan ortiq fuqaro xonadonlari ta’mirlab beriladi. Buning uchun 1 milliard so‘mdan ortiq mablag‘ sarflanishi ko‘zda tutilgan.

Bundan tashqari, 6 mingdan ortiq ehtiyojmand, 2 mingga yaqin nogiron va yolg‘iz qariyalarga qariyb 800 million so‘mlik moddiy yordamlar ajratilishi rejalashtirilgan.

21-avgustda tashkil etiladigan umumxalq xayriya hasharida 8 milliondan ortiq fuqarolar qatnashishi kutilmoqda. 21 ming gektardan ortiq yer maydonlari obodonlashtiriladi, qariyb 14 ming tonna maishiy va qurilish chiqindilari chiqarib tashlanadi. 8 mingdan ziyod qabristonlar, mingga yaqin ziyoratgohlar obodonlashtirilib, salkam 6 millionta daraxtga shakl berilib, oqlanadi.

Eslatib o‘tamiz, O‘zbekistonda umumxalq xayriya hashari so‘nggi marta 13-mart kuni o‘tkazilgandi. Unda 8,3 million kishi qatnashgani ma’lum qilindi. Bu so‘nggi yillarda aytilgan eng kichik raqam.

Eslatib o‘tamiz, 2018-yildan buyon avtomobil yo‘llari, harakatlanish tig‘iz bo‘lgan ko‘chalar, suv obyektlari, qirg‘oqbo‘yi hududlar va zonalar, qurilish maydonlari, bino va inshootlar tomlari, xavfli ishlab chiqarish obyektlari, shuningdek, insonlarning hayoti yoki sog‘lig‘iga xavf  yuzaga kelishi mumkin bo‘lgan boshqa joylarda ixtiyoriy tashabbus bilan hasharlar va boshqa ishlarni o‘tkazish taqiqlangan.

Ushbu targ‘ibot-tashviqot tadbirlarida joylarda ish beruvchilar tomonidan hasharda ko‘zda tutilgan ishlar uchun ishchilarni majburiy tarzda jalb etishga mutlaqo yo‘l qo‘yilmaydi, shunday holatlarga yo‘l qo‘ygan mutasaddilarga jazo choralari qo‘llaniladi.