Ўзбекистонда 21 август куни умумхалқ хайрия ҳашари ўтказилиши ҳақида хабар берилган эди. Ҳашар доирасида 5 мингдан ортиқ фуқаро хонадонлари таъмирлаб берилади. Бу ҳақда 19 август куни Маҳалла ва оилани қўллаб-қувватлаш вазирлиги ҳамда «Маҳалла» хайрия жамоат фонди мутасаддилари иштирокида бўлиб ўтган матбуот анжуманида маълум қилинди.
Қайд этилишича, бу сафарги хайрия ҳашарида кам таъминланган оилаларни моддий ва маънавий қўллаб-қувватлашга алоҳида эътибор қаратилади. Хусусан, ҳашар доирасида 5 мингдан ортиқ фуқаро хонадонлари таъмирлаб берилади. Бунинг учун 1 миллиард сўмдан ортиқ маблағ сарфланиши кўзда тутилган.
Бундан ташқари, 6 мингдан ортиқ эҳтиёжманд, 2 мингга яқин ногирон ва ёлғиз қарияларга қарийб 800 миллион сўмлик моддий ёрдамлар ажратилиши режалаштирилган.
21 августда ташкил этиладиган умумхалқ хайрия ҳашарида 8 миллиондан ортиқ фуқаролар қатнашиши кутилмоқда. 21 минг гектардан ортиқ ер майдонлари ободонлаштирилади, қарийб 14 минг тонна маиший ва қурилиш чиқиндилари чиқариб ташланади. 8 мингдан зиёд қабристонлар, мингга яқин зиёратгоҳлар ободонлаштирилиб, салкам 6 миллионта дарахтга шакл берилиб, оқланади.
Эслатиб ўтамиз, Ўзбекистонда умумхалқ хайрия ҳашари сўнгги марта 13 март куни ўтказилганди. Унда 8,3 миллион киши қатнашгани маълум қилинди. Бу сўнгги йилларда айтилган энг кичик рақам.
Эслатиб ўтамиз, 2018 йилдан буён автомобиль йўллари, ҳаракатланиш тиғиз бўлган кўчалар, сув объектлари, қирғоқбўйи ҳудудлар ва зоналар, қурилиш майдонлари, бино ва иншоотлар томлари, хавфли ишлаб чиқариш объектлари, шунингдек, инсонларнинг ҳаёти ёки соғлиғига хавф юзага келиши мумкин бўлган бошқа жойларда ихтиёрий ташаббус билан ҳашарлар ва бошқа ишларни ўтказиш тақиқланган.
Ушбу тарғибот-ташвиқот тадбирларида жойларда иш берувчилар томонидан ҳашарда кўзда тутилган ишлар учун ишчиларни мажбурий тарзда жалб этишга мутлақо йўл қўйилмайди, шундай ҳолатларга йўл қўйган мутасаддиларга жазо чоралари қўлланилади.
Изоҳ (0)