Ijtimoiy tarmoqlarda jurnalist Otabek Mahkamov og‘ir ahvolda ekani va O‘zbekistondagi tibbiyot muassasalari faoliyatidan norozilik bildirgani haqidagi xabarlar tarqaldi.
Unga ko‘ra, taniqli jurnalist va aktyor Otabek Mahkamov ayni vaqtda betob ekanligini ma’lum qilgan. U vaziyat og‘ir ekanligini aytib, agar vafot etadigan bo‘lsa, moliyaviy imkoniyati yaxshi bo‘lgan o‘zbeklardan yig‘ilib, O‘zbekistondagi sog‘liqni saqlash tizimini to‘g‘ri yo‘lga qo‘yishlarini iltimos qilgan.
“Vaziyat og‘ir. Agar tirik qolmasam, oxirgi iltimosim bor. Butun dunyodagi, chet ellardagi moliyaviy imkoniyati bor o‘zbeklar, qadrdonlarim: pul yig‘ib, O‘zbekistondagi sog‘liqni saqlash tizimini to‘g‘ri yo‘lga qo‘yinglar. ToshMIdagi poraxo‘rlikni yo‘q qilinglar”, — deb yozgan aktyor ijtimoiy tarmoqdagi sahifasida.
Sog‘liqni saqlash vazirligi ushbu xabarlar yuzasidan bayonot berdi.
Ma’lum qilinishicha, Sog‘liqni saqlash vazirligi vaziyatga aniqlik kiritish uchun ushbu holatni o‘rgandi. Natijada O.Mahkamov vazirlik tizimiga kiruvchi biror davolash muassasasida muolaja olmagani aniqlandi.
Bundan tashqari, jurnalist 2021-yilning iyun oyi boshida O‘zbekistondan xorijga safarga ketgani, hozirda esa AQShda davolanayotgani haqida aytilmoqda.
“Internet tarmog‘ida tarqalgan matn aynan jurnalist O.Mahkamovga tegishli ekani ham tasdiqlanmagan. Ushbu matnning oddiy imlo va grammatik qoidalarga javob bermasligi ham buni tasdiqlay oladi.
Shu munosabat bilan, ijtimoiy tarmoqdagi sahifalar adminlari, blogerlar va fuqarolardan inson hayoti bilan bog‘liq bu kabi masalalar ortidan asossiz shov-shuv qo‘zg‘ashga urinish qonunga va insoniylik tamoyillariga zid ekanini eslatib o‘tamiz”, — deyiladi vazirlik xabarida.
Bundan avval Otabek Mahkamov kasallik tufayli yurolmay qolganini ma’lum qilgandi.
Izoh (0)