Ижтимоий тармоқларда журналист Отабек Маҳкамов оғир аҳволда экани ва Ўзбекистондаги тиббиёт муассасалари фаолиятидан норозилик билдиргани ҳақидаги хабарлар тарқалди.
Унга кўра, таниқли журналист ва актёр Отабек Маҳкамов айни вақтда бетоб эканлигини маълум қилган. У вазият оғир эканлигини айтиб, агар вафот этадиган бўлса, молиявий имконияти яхши бўлган ўзбеклардан йиғилиб, Ўзбекистондаги соғлиқни сақлаш тизимини тўғри йўлга қўйишларини илтимос қилган.
«Вазият оғир. Агар тирик қолмасам, охирги илтимосим бор. Бутун дунёдаги, чет эллардаги молиявий имконияти бор ўзбеклар, қадрдонларим: пул йиғиб, Ўзбекистондаги соғлиқни сақлаш тизимини тўғри йўлга қўйинглар. ТошМИдаги порахўрликни йўқ қилинглар», — деб ёзган актёр ижтимоий тармоқдаги саҳифасида.
Соғлиқни сақлаш вазирлиги ушбу хабарлар юзасидан баёнот берди.
Маълум қилинишича, Соғлиқни сақлаш вазирлиги вазиятга аниқлик киритиш учун ушбу ҳолатни ўрганди. Натижада О.Маҳкамов вазирлик тизимига кирувчи бирор даволаш муассасасида муолажа олмагани аниқланди.
Бундан ташқари, журналист 2021 йилнинг июнь ойи бошида Ўзбекистондан хорижга сафарга кетгани, ҳозирда эса АҚШда даволанаётгани ҳақида айтилмоқда.
«Интернет тармоғида тарқалган матн айнан журналист О.Маҳкамовга тегишли экани ҳам тасдиқланмаган. Ушбу матннинг оддий имло ва грамматик қоидаларга жавоб бермаслиги ҳам буни тасдиқлай олади.
Шу муносабат билан, ижтимоий тармоқдаги саҳифалар админлари, блогерлар ва фуқаролардан инсон ҳаёти билан боғлиқ бу каби масалалар ортидан асоссиз шов-шув қўзғашга уриниш қонунга ва инсонийлик тамойилларига зид эканини эслатиб ўтамиз», — дейилади вазирлик хабарида.
Бундан аввал Отабек Маҳкамов касаллик туфайли юролмай қолганини маълум қилганди.
Изоҳ (0)