Ijtimoiy tarmoqlarda vaksina haqida turli xil mish-mishlar va yolg‘on ma’lumotlar tarqalishi kuzatilmoqda. Ushbu holat yuzasidan Sanitariya epidemiologik osoyishtalik va jamoat salomatligi xizmati boshlig‘i o‘rinbosari Botir Qurbonov aholiga murojaat qilib chiqdi.

Botir Qurbonov

Foto: SSV

“Juda ham ko‘p ijtimoiy tarmoqlarda bugungi kunda koronavirus infeksiyasiga qarshi ishlab chiqarilgan vaksinaning zararli ekani, u bilan emlangandan keyin juda ham ko‘p salbiy oqibatlarga olib kelishi va boshqa turli tuman mish-mishlar tarqalmoqda. Shu o‘rinda alohida ta’kidlash joizki, vaksina olgan shaxslarda ham kasallik qayd etilayotgani respublikada tashkil qilingan koronavirusga qarshi maxsus shifoxonalarida ba’zi bir bemorlar vaksina olganlaridan keyin ham murojaat qilayotgani yoki bo‘lmasam davo muolajalarini olayotgani uchramoqda.

Bu bilan OAVda vaksina ishlamayotgan ekan, vaksina ta’sir qilmayotgani haqida mish-mishlar ham tarqalmoqda. Yo‘q, unday emas.

Vaksina yelka mushagiga qilingandan keyin 21 kun davomida odam organizmida immun tizim shakllanadi. Ya’ni ushbu kasallikka qarshi antitanalar shakllanadi.

Ushbu vaksinaning 2-dozasi olinganda vaksina qilingan organizmda kuchliroq to‘laqonliroq immunitet shakllanadi. Bugungi kunda fuqarolar tomonidan qanday holatlar kuzatilmoqda; “Men vaksina oldim, demak men kasallikdan to‘liq himoyalandim, menga kasallik yuqmaydi” deb tibbiy niqoblardan foydalanishga chek qo‘yiladi”, – deydi Botir Qurbonov.

Shuningdek, u kasallikka qarshi kurashish qobiliyatini 100 foiz ta’minlab beradigan vaksina dunyoda yo‘qligini ma’lum qildi.

“Albatta, vaksina aholini, jumladan, vaksinatsiya olgan shaxslarni kasallikdan himoya qiladi. Lekin kasallikka qarshi kurashish qobiliyatini 100 foiz ta’minlab beradigan vaksina dunyoda yo‘q.

Kasallikdan himoya qiladi, qachonki siz ham o‘zingizni qo‘shimcha ravishda himoya qilsangiz. Sizning organizmingizda ushbu kasallikka qarshi antitanalar paydo bo‘ladi. Antitanalar miqdori sizga tushadigan virusdan yuqori bo‘ladigan bo‘lsa ushbu kasallikni yengadi.

Agarda siz vaksina olganman, deb barcha sanitariya-gigiyena qoidalariga rioya qilmaydigan bo‘lsangiz siz vaksina olgan bo‘lsangizda, lekin kasallik yuqtirib olishingiz gumoni yuqoridir.

Shu narsani alohida e’tiborga olgan holda vaksina olgan shaxslar ham vaksina olmagan shaxslar ham bugungi kunda, albatta, sanitariya-gigiyena qoidalariga rioya qilishi, tibbiy niqoblardan to‘liq foydalanishi kasallikdan himoya qilishda yordam beradi”, – deydi Botir Qurbonov.