Urganchda Malibu avtomashinasi haydovchisi YPX xodimlari bilan janjallashib, ularning qonuniy talablarini bajarishdan bosh tortdi, deb xabar bermoqda YHXBB.
Voqea 2021-yil 11-avgust kuni yuz bergan. Yo‘l harakati xavfsizligi xodimi Malibu haydovchisiga to‘xtash ishorasini berganda haydovchi qonuniy talabga bo‘ysunmay, harakatni davom ettirgan. Xodim qoidabuzar haqida ushbu yo‘nalishda xizmat olib borayotgan ikki xodimga ma’lum qilgan.
Natijada Malibu Tinchlik ko‘chasida to‘xtatilgan. Yo‘l-patrul xodimlari haydovchiga o‘zlarini tanishtirib, undan hujjatlarni taqdim etishni so‘ragan. Lekin haydovchi 30 daqiqa davomida o‘z shaxsini oshkor qilishni istamagan.
Keyin YPX xodimlari haydovchidan shaxsini aniqlash uchun viloyat Ichki ishlar boshqarmasiga borishni so‘raganda, haydovchi bunga javoban faol qarshilik ko‘rsatishni boshlagan.
Shundan so‘ng hodisa joyiga Urganch IIB tezkor tergov guruhi yetib kelgan. Haydovchiga nisbatan ma’muriy protokol tuzilib, uning Malibu avtomobili jarima maydonchasiga joylashtirilgan.
Shuningdek, huquqbuzarga nisbatan Ma’muriy javobgarlik to‘g‘risidagi kodeksning 135-moddasi (yo‘l harakati qoidalarida nazarda tutilgan hujjatlari bo‘lmagan shaxslar tomonidan transport vositalarini boshqarish) va 194-moddasi (ichki ishlar organlari xodimining qonuniy talablarini bajarmaslik) bo‘yicha bayonnoma rasmiylashtirilgan.
Bundan avval Olmaliqda YPX xodimiga qoidabuzar Malibu’ni qo‘yib yuborishni buyurgan komandir intizomiy jazoga tortilgani, Toshkentda haydovchini tegishli belgi qo‘yilmagan yo‘lda qoida buzganida ayblagan YPX xodimiga tanbeh berilgani hamda Toshkentda haydovchi va YPX xodimi o‘rtasida tortishuv sodir bo‘lgani haqida xabar berilgandi.
Izoh (0)