O‘zbekistonda berilgan PZR-test yoki vaksinatsiya sertifikati hozircha Qozog‘iston va Vengriyada amal qiladi. Bu haqda 17-avgust kuni Koronavirusga qarshi kurashish shtabi a’zosi Botir Qurbonov ma’lum qildi.
“Vaksinatsiya bo‘yicha Qozog‘iston, Vengriya bilan kelishuvga erishilgan. Bugungi kunda MDH, Yevropa davlatlari bilan ham kelishuvlar imzolanishi arafasida turibdi”, — degan u 2021-yil Davlat dasturining ijrosi bo‘yicha “Yuksalish” umummilliy harakati hamda Senatning Fan, ta’lim va sog‘liqni saqlash masalalari qo‘mitasi tashabbusi bilan o‘tkazilgan navbatdagi jamoatchilik eshituvida.
Uning so‘zlariga ko‘ra, ushbu muzokaralar TIV, Adliya vazirligi ko‘magida olib borilmoqda.
Avvalroq Koronavirusga qarshi kurashish shtabi a’zosi Sevara Ubaydullayeva o‘zbekistonliklar boshqa davlatga bormoqchi bo‘lganida albatta shu davlatlarda belgilangan vaksinalar ro‘yxati bo‘yicha emlanib borishi maqsadga muvofiq bo‘lishini aytgandi. Agar borish rejalashtirilgan davlat ro‘yxatida o‘zbek-xitoy vaksinasi bo‘lmasa, to‘liq vaksinatsiyadan o‘tgandan so‘ng 3-6 oy o‘tib, oilaviy shifokorga uchrashgan holda mos keladigan turdagi vaksinani olish mumkin.
Ayni paytda O‘zbekistonda emlash uchun “Sputnik V”, AstraZeneca, ZF-UZ-VAC 2001 (o‘zbek—xitoy) va Moderna vaksinalaridan foydalanilmoqda. Sog‘liqni saqlash vazirligi ma’lumotlariga ko‘ra, 16-avgustga kelib O‘zbekistonda O‘zbekistonda jami 12 266 057 doza vaksinadan foydalanilgan bo‘lib, shu kungacha to‘liq emlangan fuqarolar 1 423 474 nafarni tashkil qilmoqda.
Izoh (0)