Jons Hopkins universiteti ma’lumotlariga ko‘ra, dunyoda koronavirusga chalinganlar soni 207 914 588 kishiga yetdi, shularning 4 372 554 nafari vafot etgan. Dunyo bo‘ylab ayni paytgacha koronavirusga qarshi 4 724 797 711 doza vaksina qo‘llanilgan.
Kasallanganlar soni bo‘yicha AQSh (36,3 million kishi), Hindiston (32,2 million), Braziliya (20,3 million), Fransiya (6,4 million) va Rossiya (6,5 million) eng oldinda bormoqda.
Qozog‘istonning Olmaota shahrida bir oylik chaqaloq koronavirusdan vafot etdi. Bu haqda shahar sog‘liqni saqlash boshqarmasi rahbari Narimon Tabinboyev shunday bayonot berdi:
“Afsuski, koronavirus bilan kasallangan bolalar o‘limi ko‘paymoqda. Bugun kasalxonalarimizda 195 nafar, xonadonlarda – 2540 nafar infeksiyaga chalingan bola bor. Ikki yoki uch oy oldin, bahorda “britancha”shtammga duch kelganimizda kasalxonalarda 30-40 dan ortiq bola bo‘lmagan. Bolalarning kasallanishi bir hafta oldin cho‘qqisiga chiqdi — 245 bola. Afsuski, bir o‘lim holatini ham tasdiqladik. Bir oylik chaqaloq koronavirusning delta shtammi bilan kasallanib, uning oqibatida nobud bo‘lgani tasdiqlandi. Bu hodisa bir oy oldin sodir bo‘lgan. Menga Bolalar yuqumli kasalliklar shifoxonasidan bildirishnoma yuborildi. Bu tur juda xavfli. Afsuski, bizning bolalarimiz xavf ostida ”.
Mavzuga doir: Qozog‘istonda bir sutkada 7778 kishida COVID-19 aniqlandi. Bu pandemiya boshidan beri eng yuqori ko‘rsatkich
Pandemiya boshidan beri Gruziyada 490 462 kishida COVID-19 qayd etilgan, ularning 6 483 nafari kasallikdan vafot etgan (kuniga 47 ta).
Yaponiya hukumati COVID-19 tufayli Tokiodagi favqulodda vaziyatni 12-sentabrgacha uzaytirishga qaror qildi, shuningdek yana bir nechta prefekturalarga cheklovlar joriy qilinadi.“Biz Tokio va boshqa beshta prefekturada favqulodda holat rejimini uzaytirish zarur degan xulosaga keldik. Shuningdek, Ibaraki, Totigi, Gumma, Shidzuoka, Kioto, Xyogo va Fukuoka prefekturalarini favqulodda holatdagi prefekturalar ro‘yxatiga qo‘shishga qaror qildik”, — dedi Yaponiyaning iqtisodiy tiklanish vaziri Yasutosi Nisimura. Uning aniqlik kiritishicha, sanab o‘tilgan yettita prefekturada favqulodda holat rejimi 20-avgustdan joriy qilinadi.
Mamlakatning yana o‘nta prefekturasida koronavirusning yangi shtammlari tarqalishiga qarshi kuchaytirilgan choralar ko‘riladi. Shunday qilib, 20-avgustdan Yaponiyada uzaytirilgan favqulodda holat rejimi 13 ta prefekturada, shu jumladan Tokioda, kuchaytirilgan choralar rejimi esa 16 ta prefekturada amal qiladi.
Yaponiyada koronavirus tarqalishi bilan bog‘liq vaziyat so‘nggi haftalarda tobora yomonlashib bormoqda. Mamlakatda butun pandemiya davomida kasallik yuqtirganlar soni o‘tgan hafta 1 milliondan oshdi. Hozir bu raqam 1 million 176 mingtani tashkil qiladi. Mamlakatda koronavirus tufayli 15,4 ming kishi vafot etgan. 960 mingga yaqin kishi kasallikdan tuzalgan, 1,6 mingdan ortiq bemorning ahvoli og‘ir.
Germaniyada aholini koronavirusga qarshi vaksinaning uchinchi dozasi bilan emlash kampaniyasi boshlandi. Hozirda koronavirusga qarshi vaksinaning uchinchi dozasi alohida xavf guruhidagi kishilarga taklif qilinmoqda. Bularga, birinchi navbatda, qariyalar uyida yashovchilar, immuniteti zaif odamlar va 80 yoshdan oshganlar kiradi. Ushbu toifalarga mansub aholi uchun koronavirusdan vafot etish xavfi eng yuqori.Uchinchi doza bilan emlashning yana bir sharti shundaki, vaksina ikkinchi doza bilan kamida olti oy avval emlanganlarga yuboriladi.
Bavariya (Germaniyaning janubi va janubi-sharqidagi federal shtat) sog‘liqni saqlash vaziri Klaus Xolezchekning aytishicha, mintaqadagi shifokorlar va vaksinatsiya markazlari COVID-19 ga qarshi qo‘shimcha emlashlarni shu haftadan boshlaydi. Shu bilan birga, Germaniyaning boshqa federal shtatlari hukumatlari sentabr oyidan vaksinaning uchinchi dozasi bilan emlashni boshlashga rozi bo‘lgan. Mamlakatning ko‘plab hududlarida emlash kampaniyasiga tayyorgarlik ko‘rilmoqda.
Ta’kidlanishicha, qo‘shimcha emlash ikkita mRNK vaksinasidan biri yordamida amalga oshiriladi: Pfizer / BioNTech yoki Moderna. AstraZeneca yoki Johnson & Johnson kabi vektorli vaksina olgan odamlar ham qo‘shimcha vaksina olish huquqiga ega bo‘ladi.
Izoh (0)