Afg‘oniston maxsus kuchlari tarqatib yuborildi, aholidan qurol-yarog‘lar musodara qilinmoqda

Afg‘oniston milliy armiyasining maxsus topshiriqli korpusi tarqatib yuborilgan deb e’lon qilindi. Bu haqda “Interfaks” maxsus kuchlar matbuot xizmatiga tayanib xabar berdi.

“So‘nggi lahzagacha maxsus kuchlar vakillari mas’uliyatsizlik qilmasdan, afg‘on xalqining hayoti va mol-mulkini saqlab qolish uchun hurmatli rahbariyat zarur deb hisoblagan barcha narsalarni qildi”, — deyiladi bayonotda.

Ta’kidlanishicha, korpusning butun shaxsiy tarkibi ishdan bo‘shatilgan, bo‘linmaning o‘zi tugatilgan.

Shuningdek, Afg‘oniston sharqidagi Xost viloyatida maxsus qo‘riqlov bo‘linmasi (Khost Protection Force — KPF) “Tolibon” harakatiga taslim bo‘lgan.

“KPF AQSh tomonidan tuzilgan maxsus bo‘linma edi, uni Afg‘oniston hukumati boshqarmagan. Ular Xost, Paktiya va Paktika viloyatlariga joylashtirilgan hamda minglab odamlarni o‘zboshimchalik bilan qatl qilgani bilan mashhur edi”, — deyiladi afg‘onistonlik jurnalistlardan biri ijtimoiy tarmoqqa joylagan postda.

Ularning ma’lumotlariga ko‘ra, maxsus bo‘linmaning 1200 ta avtomobilda o‘tirgan 6 mingga yaqin jangchilari “Tolibon”ga taslim bo‘lgan. Xost viloyati jangarilar qo‘liga o‘tganidan keyin KPF jangchilari ularning qasos olishidan qo‘rqib, qo‘shni Paktiya viloyatiga qochib o‘tishga uringan, ammo yo‘lda “Tolibon” tomonidan to‘xtatilgan.

Bu orada Kobulda “Tolibon” mahalliy aholidan qurollarni musodara qilmoqda. Gazetalarning yozishicha, afg‘onistonliklarning juda ko‘pchiligida qurol bo‘lgani sababli hokimiyat tepasiga “Tolibon” kelganidan norozi bo‘lgan bir guruh odamlar ularga qarshilik ko‘rsatishi xavfi bor.

“Tolibon” vakili aytishicha, odamlar endi shaxsiy himoya uchun qurolga muhtoj emas. “Odamlar o‘z xavfsizligi uchun qurol saqlaganini tushunamiz. Endi ular o‘zlarini xavfsiz his qilishi mumkin. Biz bu yerda begunoh fuqarolarga zarar yetkazish uchun turganimiz yo‘q”, — dedi harakat vakili.