“Tolibon” Afg‘oniston hukumati amaldorlariga umumiy amnistiya e’lon qildi va davlat organlarining faoliyatini qayta tiklashga chaqirdi. Bu haqda “Tolibon” tarqatgan bayonotga asoslanib, “RBK” xabar berdi.
“Hamma uchun umumiy amnistiya e’lon qilindi, shuning uchun siz to‘liq ishonch bilan odatiy hayotingizga qaytishingiz kerak”, — deyiladi bayonotda.
15-avgust kuni “Tolibon” jangarilari Kobulda prezident saroyini egallab, Afg‘oniston ustidan to‘liq nazorat o‘rnatganini e’lon qilgach, prezident Ashraf G‘ani mamlakatni tark etdi. U qatliom sodir bo‘lmasligi uchun iste’foga chiqqanini aytdi.
O‘z navbatida, Afg‘oniston vitse-prezidenti Amrulla Solih mamlakatda xalq bilan qolishini ma’lum qildi. “O‘z yerimda. Xalq bilan birga. Sabab va maqsad bilan. Haqiqatga qat’iy ishonch bilan. Bizning qonunchiligimiz — Pokiston tomonidan qo‘llab-quvvatlanayotgan zulm va shafqatsiz diktaturaga qarshi turish”, — dedi u. Avvalroq u hech qachon “Tolibon” jangarilari oldida bosh egmasligini aytgandi.
Afg‘onistonning Pajhwok agentligi xabar berishicha, Ashraf G‘ani qochib ketganidan keyin sobiq hukumatdagi yuqori lavozimli amaldorlarning aksariyati va ko‘plab afg‘on siyosatchilari mamlakatni tark etgan. Agentlik ta’kidlashicha, siyosiy elitaning bir qismi Afg‘onistonda qolgan, ular yangi siyosiy inqirozning oldini olish, hukumatdagi bo‘shliqni to‘ldirish va uni tinch yo‘l bilan topshirish niyatida.
Pajhwok ma’lumotlariga ko‘ra, G‘ani, uning milliy xavfsizlik bo‘yicha maslahatchisi Hamdulloh Mohib va prezident ma’muriyatining sobiq rahbari Fazl Mahmud Fazli avval Tojikistonga, undan keyin Ummonga uchib ketgan.
Ilgari Balx viloyatida “Tolibon”ga qarshi urush e’lon qilgan taniqli siyosiy arboblar marshal Abdurashid Do‘stum va Ato Muhammad Nur “Tolibon” mamlakat shimolidagi asosiy shahar — Mozori Sharifni egallab olgach, Tojikistonga qochib ketgan. Afg‘oniston Milliy xavfsizlik kengashi raisining sobiq o‘rinbosari Serur Ahmad Durrani AQShga jo‘nab ketdi, prezidentning qonun bo‘yicha bosh maslahatchisi Kabir Issa Hel esa Buyuk Britaniyaga ketdi. Mudofaa vaziri Bismillah Muhammadiy Dubayga, Hirot viloyatidagi xalq lashkari rahbari Muhammad Ismoilxon Eronga jo‘nab ketdi.
Bundan tashqari, Pajhwok xabariga ko‘ra, Xalq palatasi (parlament quyi palatasi) spikeri Mir Rahmon Rahmoniy boshchiligidagi afg‘on siyosatchilaridan iborat katta delegatsiya Pokiston rahbariyati bilan Afg‘onistonda tinchlik va barqarorlikni ta’minlash masalalarini muhokama qilish uchun Pokistonga yo‘l olgan.
O‘z navbatida, Afg‘onistonning sobiq prezidenti Hamid Karzay, Milliy yarashuv Oliy kengashi rahbari Abdulla Abdulla va Afg‘oniston Islom partiyasi rahbari Gulbeddin Hikmatyorlar hokimiyatni “Tolibon”ga tinch yo‘l bilan topshirish uchun Muvofiqlashtiruvchi kengash tuzgan.
Pajhwok’ning yozishicha, Afg‘onistondagi tojiklar jamiyatining nufuzli rahbari Ahmad Shoh Massudning o‘g‘li Ahmad Masud, sobiq birinchi vitse-prezident Amrulla Solih va boshqa bir qancha nufuzli siyosatchilar Afg‘onistonning “Tolibon” hali yetib bormagan Panjshir viloyatida bo‘lib turibdi. Ular “Tolibon”ga qarshilik ko‘rsatuvchi kuch tashkil qilish niyatida.
16-avgust kuni The Washington Post (WP) gazetasi AQSh va Afg‘onistondagi manbalarga tayanib, “Tolibon” afg‘onistonlik amaldorlarga qurol evaziga pora bergani haqida yozgandi.
Shuningdek, “Tolibon” a’zolari Kobuldagi vaziyatni o‘z nazoratiga olgach, jinoyatlarga aloqador kimsalarni hibsga olishni boshlagani xabar qilindi. Tashkilot rasmiy vakili Zabihullo Mujohidning so‘zlariga ko‘ra, hech kimga sobiq amaldorlarning uyiga kirishi, uni vayron qilishi, ulardan mashina talab qilishi yoki odamlarga tahdid qilishiga ruxsat berilmagan. Bunday kimsalarga jiddiy tarzda munosabatda bo‘linadi va ular jiddiy ta’qibga uchraydi.
Izoh (0)