Жонс Ҳопкинс университети маълумотларига кўра, дунёда коронавирусга чалинганлар сони 207 914 588 кишига етди, шуларнинг 4 372 554 нафари вафот этган. Дунё бўйлаб айни пайтгача коронавирусга қарши 4 724 797 711 доза вакцина қўлланилган.
Касалланганлар сони бўйича АҚШ (36,3 миллион киши), Ҳиндистон (32,2 миллион), Бразилия (20,3 миллион), Франция (6,4 миллион) ва Россия (6,5 миллион) энг олдинда бормоқда.
Қозоғистоннинг Олмаота шаҳрида бир ойлик чақалоқ коронавирусдан вафот этди. Бу ҳақда шаҳар соғлиқни сақлаш бошқармаси раҳбари Наримон Табинбоев шундай баёнот берди:
«Афсуски, коронавирус билан касалланган болалар ўлими кўпаймоқда. Бугун касалхоналаримизда 195 нафар, хонадонларда – 2540 нафар инфекцияга чалинган бола бор. Икки ёки уч ой олдин, баҳорда «британча»штаммга дуч келганимизда касалхоналарда 30-40 дан ортиқ бола бўлмаган. Болаларнинг касалланиши бир ҳафта олдин чўққисига чиқди — 245 бола. Афсуски, бир ўлим ҳолатини ҳам тасдиқладик. Бир ойлик чақалоқ коронавируснинг дельта штамми билан касалланиб, унинг оқибатида нобуд бўлгани тасдиқланди. Бу ҳодиса бир ой олдин содир бўлган. Менга Болалар юқумли касалликлар шифохонасидан билдиришнома юборилди. Бу тур жуда хавфли. Афсуски, бизнинг болаларимиз хавф остида».
Мавзуга доир: Қозоғистонда бир суткада 7778 кишида COVID-19 аниқланди. Бу пандемия бошидан бери энг юқори кўрсаткич
Пандемия бошидан бери Грузияда 490 462 кишида COVID-19 қайд этилган, уларнинг 6 483 нафари касалликдан вафот этган (кунига 47 та).
Япония ҳукумати COVID-19 туфайли Токиодаги фавқулодда вазиятни 12 сентябргача узайтиришга қарор қилди, шунингдек яна бир нечта префектураларга чекловлар жорий қилинади.«Биз Токио ва бошқа бешта префектурада фавқулодда ҳолат режимини узайтириш зарур деган хулосага келдик. Шунингдек, Ибараки, Тотиги, Гумма, Шидзуока, Киото, Хёго ва Фукуока префектураларини фавқулодда ҳолатдаги префектуралар рўйхатига қўшишга қарор қилдик», — деди Япониянинг иқтисодий тикланиш вазири Ясутоси Нисимура. Унинг аниқлик киритишича, санаб ўтилган еттита префектурада фавқулодда ҳолат режими 20 августдан жорий қилинади.
Мамлакатнинг яна ўнта префектурасида коронавируснинг янги штаммлари тарқалишига қарши кучайтирилган чоралар кўрилади. Шундай қилиб, 20 августдан Японияда узайтирилган фавқулодда ҳолат режими 13 та префектурада, шу жумладан Токиода, кучайтирилган чоралар режими эса 16 та префектурада амал қилади.
Японияда коронавирус тарқалиши билан боғлиқ вазият сўнгги ҳафталарда тобора ёмонлашиб бормоқда. Мамлакатда бутун пандемия давомида касаллик юқтирганлар сони ўтган ҳафта 1 миллиондан ошди. Ҳозир бу рақам 1 миллион 176 мингтани ташкил қилади. Мамлакатда коронавирус туфайли 15,4 минг киши вафот этган. 960 мингга яқин киши касалликдан тузалган, 1,6 мингдан ортиқ беморнинг аҳволи оғир.
Германияда аҳолини коронавирусга қарши вакцинанинг учинчи дозаси билан эмлаш кампанияси бошланди. Ҳозирда коронавирусга қарши вакцинанинг учинчи дозаси алоҳида хавф гуруҳидаги кишиларга таклиф қилинмоқда. Буларга, биринчи навбатда, қариялар уйида яшовчилар, иммунитети заиф одамлар ва 80 ёшдан ошганлар киради. Ушбу тоифаларга мансуб аҳоли учун коронавирусдан вафот этиш хавфи энг юқори.Учинчи доза билан эмлашнинг яна бир шарти шундаки, вакцина иккинчи доза билан камида олти ой аввал эмланганларга юборилади.
Бавария (Германиянинг жануби ва жануби-шарқидаги федерал штат) соғлиқни сақлаш вазири Клаус Холезчекнинг айтишича, минтақадаги шифокорлар ва вакцинация марказлари COVID-19 га қарши қўшимча эмлашларни шу ҳафтадан бошлайди. Шу билан бирга, Германиянинг бошқа федерал штатлари ҳукуматлари сентябрь ойидан вакцинанинг учинчи дозаси билан эмлашни бошлашга рози бўлган. Мамлакатнинг кўплаб ҳудудларида эмлаш кампаниясига тайёргарлик кўрилмоқда.
Таъкидланишича, қўшимча эмлаш иккита мРНК вакцинасидан бири ёрдамида амалга оширилади: Pfizer/BioNTech ёки Moderna. AstraZeneca ёки Johnson & Johnson каби векторли вакцина олган одамлар ҳам қўшимча вакцина олиш ҳуқуқига эга бўлади.
Изоҳ (0)