Turkiya Kobul aeroportini boshqarish mas’uliyatini o‘z zimmasiga olishdan bosh tortdi, ammo agar shunday so‘rov kelib tushsa, “Tolibon” harakatiga texnik ta’minot va xavfsizlik sohasida yordam berishga tayyor. Bu haqda Reuters Turkiya xavfsizlik kuchlaridagi manbalariga tayanib xabar bermoqda.
“Agar ‘Tolibon’ texnik ko‘mak so‘rasa, Turkiya aeroportdagi texnika va xavfsizlik sohasida yordam berishi mumkin”, — dedi agentlik hamsuhbatlaridan biri. Uning so‘zlariga ko‘ra, havo bandargohidagi “butunlay tartibsizlik” fonida “boshqaruvning turkiyalik harbiylar tomonidan olinishi avtomatik tarzda to‘xtatilgan”.
14-aprel kuni AQSh prezidenti Jo Bayden Afg‘onistondagi operatsiyani yakunlashga qaror qildi, u AQSh tarixidagi eng uzoq davom etgan xorijiy harbiy kampaniyaga aylandi. 14-iyun kuni Turkiya prezidenti Rajab Toyyib Erdo‘g‘on u yerdan NATO qo‘shinlari olib ketilgach, agar AQSh tomonidan moliyaviy ko‘mak bo‘lsa, Turkiya Afg‘onistonda harbiy kontingentini saqlab qolishi mumkinligini aytdi.
Iyulda Erdo‘g‘on AQSh keragicha qo‘llab-quvvatlab tursa, Turkiya Kobul aeroportini boshqarishga tayyorligini bildirdi.
Hozir Kobul aeroporti Afg‘onistonni tark etish mumkin bo‘lgan yagona joy, aeroport AQSh harbiylari nazorati ostida. Minglab odamlar uchib ketishni xohlaydi, 16-avgust kuni ertalab ular reyslardan birortasiga o‘tirish uchun aerodromga bostirib kirgan va yerda turgan samolyotlarga osilib chiqishga harakat qilgan. Hodisa oqibatida 7 kishi halok bo‘lgan.
Eslatib o‘tamiz, 15-avgust kuni “Tolibon” Afg‘onistonning butun hududini o‘z nazorati ostiga olganini e’lon qildi. Shu kuni “Tolibon” Kobuldagi prezident saroyiga kirdi. Keyinroq hukumat kuchlari tark etgan barcha davlat muassasalarini va davlat televideniyesini egallab oldi.
Afg‘oniston prezidenti Ashraf G‘ani iste’fo berishga rozi bo‘lgan va mamlakatni tark etgan. The New York Times va Al Jazeera Ashraf G‘anining O‘zbekistonga yo‘l olgani haqida xabar berdi. Ammo keyinroq Ashraf G‘ani O‘zbekistonda ham, Tojikistonda ham, Qozog‘istonda ham emasligi ma’lum qilindi.
Izoh (0)