Ўзбекистон мусулмонлари идораси раиси муфтий Усмонхон Алимов 15 август куни вафот этганди. Чеченистон раҳбари Рамзан Қодиров унинг вафоти муносабати билан ҳамдардлик билдирди.
Қодиров муфтийнинг ўлими ҳақидаги хабарни қайғу билан қабул қилган. У Шайх Усмонхон Алимов Чеченистоннинг биринчи президенти, Россия Қаҳрамони Аҳмад ҳожи Қодировнинг яқин дўсти бўлганини, улар 1980 йиллардан бери таниш эканини, биргаликда Тошкент ислом институтида бирга ўқишганини қайд этган.
«Мен ҳам Усмонхон Алимов билан кўп марта учрашганман. Биз нафақат Грознийда, балки Ўзбекистонда ҳам кўришганмиз. Тошкентга сафарим чоғида у мени жуда самимий кутиб олди, юқори даражадаги меҳмондўстликни таъминлади, Аҳмад ҳожи билан ўқиган йилларини эслади ва бу ҳақда гапирди. У жуда доно, тақводор ва камтар одам эди», — дейди у.
Қодиров Усмонхон Алимовни бутун мусулмон олами танигани, ҳурмат қилгани ва қадрлаганини ҳам таъкидлади.
«У ўз ҳаётини Ислом динини ўрганиш ва тарқатишга бағишлади, у Қуръон ва суннат ҳақида бебаҳо билим олган кўплаб таниқли инсонларни тарбиялади. 2006 йилдан Ўзбекистон мусулмонлари идораси раиси эди. Ўз марузаларида шайх доим яхшиликка чақириб, ҳаромдан қайтарган.
Шу кунларда қардош Ўзбекистон халқи билан қалбан биргамиз. Ўзбекистоннинг ҳурматли Президенти Шавкат Мирзиёевга, Шайх Усмонхон Алимовнинг оиласи ва яқинларига самимий ҳамдардлик билдираман! Аллоҳ таоло биродаримизни раҳматига олсин!», — деган Чеченистон раҳбари.
Эслатиб ўтамиз, Усмонхон Алимов сўнгги вақтларда Москвада даволанаётган эди — у ўпка ва қон-томир касалликлари, хусусан, ўпка пневмонияси бўйича муолажалар олаётган эди. Муфтийнинг жаноза намози ва таъзия маросимлари 16 август куни Самарқанд вилояти Иштихон тумани Орлот қишлоғи «Эшони Темирхон Тўра» (аввалги «Орлот» масжиди) жоме масжидида бўлиб ўтади.
Изоҳ (0)