Afg‘onistondagi o‘zbeklar yetakchisi, nufuzli harbiy va siyosiy arbob Abdurashid Do‘stum kuni kecha Afg‘oniston—O‘zbekiston chegarasini kesib o‘tgan va hozirda O‘zbekiston hududida bo‘lib turibdi. Bu haqda vaziyatdan boxabar manbaga tayanib, Rossiyaning “RIA Novosti” agentligi xabar bermoqda. Reuters agentligi o‘z manbalariga asoslanib yozishicha, Mozori-Sharif qo‘ldan ketgach, Do‘stum xavfsiz O‘zbekiston tomon chekingan.
Rossiyaning “TASS” agentligi afg‘onistonlik Hamid ismli jurnalistga tayanib xabar berishicha, marshal Do‘stum toliblardan qochib, o‘z yaqinlari bilan birga o‘zbek—afg‘on chegarasidagi yagona nazorat-o‘tkazish punkti orqali O‘zbekistonga o‘tgan. Avvalroq O‘zbekiston Tashqi ishlar vazirligi 15-avgust kuni 84 nafar afg‘onistonlik chegaradan o‘tgani va ular DXX Chegara qo‘shinlari tomonidan qo‘lga olinganini ma’lum qilgan edi.
O‘zbekiston rasmiylari Abdurashid Do‘stumning hozirgi vaqtda mamlakat hududida ekanini hozircha na tasdiqladi va na rad etdi. “Daryo” hozircha ushbu masala yuzasidan O‘zbekistonning vakolatli organlaridan ma’lumot ololganicha yo‘q.
Eslatib o‘tamiz, 14-avgust kuni Afg‘oniston hukumatining mamlakat shimolidagi so‘nggi tayanchi hisoblangan Mozori-Sharif shahri “Tolibon” nazorati ostiga o‘tdi. Shaharni tashlab qochgan Afg‘oniston mudofaa va xavfsizlik kuchlari, jumladan, Termiz—Hayraton ko‘prigiga yig‘ilgan va chegaraning O‘zbekiston tomondan ochilishini kutgan.
Ma’lumotlarga ko‘ra, ular orasida Afg‘oniston o‘zbeklari yetakchisi Do‘stum va tojiklar yetakchisi Ato Muhammad Nur ham bo‘lgan. Biroq ularning ayni vaqtda qayerda ekani rasman noma’lum. Ato Muhammad Nur 15-avgustga o‘tar kechasi Twitter’dagi sahifasida xabar qoldirib, o‘zi va marshal Do‘stum “xavfsiz joyda” ekanini ma’lum qilgan edi.
“TASS”ning qayd etishicha, toliblar Mozori-Sharifni ikkinchi marta ortiqcha qiyinchiliksiz qo‘lga kiritdi. “Tolibon” bu shaharni birinchi marta 1998-yili bosib olgan va uni 2001-yilga qadar o‘z nazorati ostida ushlab turgan. Xuddi bu yilgidek, 1998-yili ham shahar mudofaasiga Abdurashid Do‘stum rahbarlik qilgan.
“Do‘stum 1998-yili poytaxtida ko‘pdan beri uning oilasi va yaqin qarindoshlari istiqomat qiladigan O‘zbekiston tomon qochishga uringan. Biroq uni respublikaning Birinchi Prezidenti Islom Karimov ko‘rsatmasiga muvofiq O‘zbekistonga kiritishmagan, oqibatda u Turkiyaga qochishga majbur bo‘lgan edi”, — deb yozadi “TASS” agentligi.
Izoh (0)