Shavkat Mirziyoyev Rossiya prezidenti Vladimir Putin bilan 15-avgust kuni telefon orqali muloqot qilib, Afg‘onistonda yuzaga kelayotgan vaziyat bo‘yicha fikr almashdi.
Rossiya prezidenti matbuot xizmatining ma’lum qilishicha, suhbatda Afg‘onistondagi vaziyatning rivojlanishi atroflicha muhokama qilindi. Shuni hisobga olgan holda, Rossiya va O‘zbekistonning tegishli vazirlik va idoralari o‘rtasida o‘zaro hamkorlikni faollashtirishga kelishib olindi. Davlat rahbarlari bundan keyin ham o‘zaro muntazam aloqalarni davom ettiradi.
O‘zbekiston Prezidenti matbuot xizmatining qayd etishicha, mintaqaviy xavfsizlik va barqarorlikni ta’minlash borasida ikki mamlakatning tegishli idoralari o‘rtasida yaqin aloqalar va hamkorlikni davom ettirish yuzasidan kelishuvga erishildi.
Suhbatda O‘zbekiston va Rossiya o‘rtasidagi strategik sheriklik va ittifoqchilik munosabatlarini yanada rivojlantirish hamda ko‘p qirrali hamkorlikni kengaytirish masalalari ham ko‘rib chiqildi.
Prezidentlar 5-iyul kuni bo‘lib o‘tgan telefon orqali muloqotda ham Afg‘onistondagi ahvol yomonlashishi munosabati bilan Markaziy Osiyodagi vaziyatning rivojiga alohida to‘xtalib o‘tib, O‘zbekiston va Rossiyaning vakolatli idora va tashkilotlari o‘rtasidagi muntazam muloqotlar va yaqin hamkorlikni davom ettirishga kelishib olgandi.
Eslatib o‘tamiz, 14-avgust kuni Afg‘oniston shimolidagi Mozori-Sharif shahri (Termizdan 58 kilometr janubda joylashgan) “Tolibon” qo‘liga o‘tgani ma’lum bo‘lgandi. Shahar topshirilgach, Afg‘oniston mudofaa va xavfsizlik kuchlari O‘zbekiston bilan chegara tomon chekindi, 15-avgustga o‘tar kechasi Hayraton va Termiz oralig‘idagi ko‘prikda yuzlab afg‘onistonliklar to‘plandi.
15-avgust tongida esa O‘zbekiston tomoni Afg‘oniston Qurolli Kuchlarining harbiy xizmatchilaridan iborat 84 kishilik guruhni qabul qilgani (ular orasida uch nafar yarador ham bo‘lgan), ular DXX Chegara qo‘shinlari tomonidan qo‘lga olinib, O‘zbekiston hududida vaqtincha bo‘lib turishi tashkil etilgani ma’lum bo‘ldi. Soat 10:00 ga kelib, ushbu ko‘prikdagi vaziyat yumshadi. Afg‘onistonliklarning asosiy qismi ko‘prikni tark etdi. Peshinga yaqin esa Hayraton ko‘prigi atrofidagi vaziyat butunlay barqarorlashdi.
Shu kuni “Tolibon” harakati Afg‘oniston hududini to‘liq o‘z nazorati ostiga olganini e’lon qildi. Harakat Afg‘onistonni tark etmoqchi bo‘lgan barcha chet elliklar Kobul aeroporti orqali mamlakatdan to‘siqsiz chiqib ketishiga va’da bermoqda. Qolish istagida bo‘lganlar esa harakat vakillariga uchrashib, ro‘yxatdan o‘tishi kerak. Bundan tashqari, harakat jamoatchilik orasida o‘zboshimchalik bilan jazolash holatlariga yo‘l qo‘ymaslikni rejalashtirmoqda. Shuningdek, Afg‘oniston hududidan boshqa davlatlarga qarshi harakatlar olib borishiga yo‘l qo‘ymasligiga ishontirmoqda.O‘zbekiston rasmiylarining ma’lum qilishicha, O‘zbekistonning Kobuldagi elchixonasi va Mozori-Sharifagi konsulligi faoliyatini davom ettirmoqda va xodimlar hali evakuatsiya qilingani yo‘q.
Afg‘oniston prezidenti Ashraf G‘ani esa iste’fo berib, Tojikistonga uchib ketgani aytilmoqda.
Izoh (0)