“Boshpana so‘ragan afg‘onistonlik qochqinlar bo‘yicha insonparvarlik tamoyillariga mos harakat qilinishi lozim” — Alisher Qodirov

Oliy Majlis Qonunchilik palatasi spikeri o‘rinbosari, prezidentlikka nomzod Alisher Qodirov Afg‘onistondagi vaziyat bo‘yicha munosabat bildirib, boshpana so‘ragan afg‘onistonlik qochqinlar bo‘yicha insonparvarlik tamoyillariga mos harakat qilinishi lozimligini aytdi.

“Afg‘onistondagi vaziyat rejalashtirilganidek keskinlashdi. Qochqinlar va boshpana so‘raganlar bo‘yicha xalqaro huquq talablari doirasida, insonparvarlik tamoyillariga mos harakat qilinishi lozim. Afg‘oniston xalqi, jumladan, shimoldagi millatdoshlarimizga Afg‘oniston yangi boshqaruvining munosabatiga jahon hamjamiyati bilan bir to‘lqinda baho berib borilishi zarur. Afg‘onistonning yangi boshqaruviga afg‘onistonliklarning munosabati qanday bo‘lishini esa vaqt ko‘rsatadi. Barqaror va hamkor Afg‘oniston mintaqa taqdirida ijobiy burilish nuqtasi bo‘lishi tarafdorimiz”, — deb yozgan u Telegram kanalida.

Esaltib o‘tamiz, 14-avgust kuni Afg‘oniston shimolidagi Mozori-Sharif shahri (Termizdan 58 kilometr janubda joylashgan) “Tolibon” qo‘liga o‘tgani ma’lum bo‘lgandi. Shahar topshirilgach, Afg‘oniston mudofaa va xavfsizlik kuchlari O‘zbekiston bilan chegara tomon chekingan, 15-avgustga o‘tar kechasi Hayraton va Termiz oralig‘idagi ko‘prikda yuzlab afg‘onistonliklar to‘plangan. Shu kuni tushga yaqin ushbu ko‘prikdagi vaziyat barqarorlashdi. Afg‘onistonliklarning asosiy qismi ko‘prikni tark etdi.