O‘zbekistonni Afg‘oniston bilan bog‘lovchi Hayraton (“Do‘stlik”) ko‘prigi atrofidagi vaziyat butunlay barqarorlashgani haqida xabar berilgan edi. “O‘zbekiston 24” telekanali ushbu ko‘prikdan olingan videolavhani e’lon qildi.
Unda ko‘prikdagi vaziyat tinch va afg‘onistonliklardan holi ekanligi, chegara qo‘shinlari tomonidan qo‘riqlanayotganini ko‘rish mumkin.
Eslatib o‘tamiz, 14-avgust kuni Afg‘oniston shimolidagi Mozori-Sharif shahri (Termizdan 58 kilometr janubda joylashgan) “Tolibon” qo‘liga o‘tgani ma’lum bo‘lgandi. Shahar topshirilgach, Afg‘oniston mudofaa va xavfsizlik kuchlari O‘zbekiston bilan chegara tomon chekindi, 15-avgustga o‘tar kechasi Hayraton va Termiz oralig‘idagi ko‘prikda yuzlab afg‘onistonliklar to‘plandi.
15-avgust tongida O‘zbekiston tomoni Afg‘oniston Qurolli Kuchlarining harbiy xizmatchilaridan iborat 84 kishilik guruhni qabul qilgani (ular orasida uch nafar yarador ham bo‘lgan), ular DXX Chegara qo‘shinlari tomonidan qo‘lga olinib, O‘zbekiston hududida vaqtincha bo‘lib turishi tashkil etilgani ma’lum bo‘ldi. Shu kuni soat 10:00 holatiga ko‘ra, ushbu ko‘prikdagi vaziyat yumshadi. Afg‘onistonliklarning asosiy qismi ko‘prikni tark etdi. Peshinga yaqin esa Hayraton ko‘prigi atrofidagi vaziyat butunlay barqarorlashdi.
O‘zbekiston rasmiylarining ma’lum qilishicha, Afg‘oniston bilan chegarada barcha xavfsizlik choralari ko‘rilgan.
Izoh (0)