AQSh harbiy razvedkasining taxminiga ko‘ra, “Tolibon” 90 kun ichida Afg‘oniston poytaxti Kobulni egallab olishi mumkin. Bu haqda CNN, Reuters va The Washington Post manbalariga tayanib xabar berdi.
“Tolibon”ning Afg‘onistondagi muvaffaqiyatlari fonida AQSh razvedkasi o‘z prognozini og‘irlashtirdi. Shu bilan birga, Kobul qulashining aniq vaqtini oldindan aytib bo‘lmaydi.
The Washington Post’ning boshqa anonim manbalari ta’kidlashicha, ba’zi prognozlarda jangarilar Kobulni bir oy ichida egallashi mumkinligi aytilmoqda. CNN manbasining xabar berishicha, shuningdek, AQSh harbiylari shaharning “Tolibon” tomonidan yaqin 30-60 kun ichida yakkalab qo‘yilishini taxmin qilmoqda.
6-avgustdan buyon “Tolibon” to‘qqiz viloyatning markazlarini, jumladan, Qunduzni egallab oldi. CNN manbasiga ko‘ra, ularning Kobul shimolida joylashgan Bag‘lon viloyati hududlarini qo‘lga olishi AQShning e’tiborini tortdi, chunki bu joy poytaxt mudofaasi uchun muhim hisoblanadi.
Hozircha AQSh shaharning bosib olinishi xavfi ostida Kobuldagi elchixonasini tark etmoqchiligini rasman e’lon qilmagan. Politico nashrining manbalarga tayanib xabar berishicha, AQSh Kobuldagi elchixonadan diplomatik xodimlarini evakuatsiya qilish imkoniyatini ko‘rib chiqmoqda.
Manbalardan birining aytishicha, evakuatsiya shu oy oxirigacha amalga oshirilishi mumkin.
AQSh Davlat departamenti rasmiysi NatSec Daily nashriga bergan intervyusida buni tasdiqlagan: “Har bir diplomatik missiyada bo‘lgani kabi, xavfsizlik sharoiti og‘ir bo‘lganda biz tahdidlarni har kuni baholab boramiz va elchixonamizda ishlayotganlarning xavfsizligini ta’minlash uchun ularning manfaatlariga javob beradigan qarorlar qabul qilamiz”.
Rasmiyning ta’kidlashicha, AQShning Kobuldagi elchixonasi “27-apreldan buyon buyruq olinishi bilan jo‘nab ketish statusida bo‘lib turibdi”.
Avvalroq Reuters Yevropa Ittifoqidagi manbaga tayanib, “Tolibon” bugungi kunda Afg‘oniston hududining 65 foizini nazorat qilayotgani haqida xabar berdi. Iyulda “Tolibon” Afg‘oniston chegarasining 90 foizini o‘z nazoratiga olganini ma’lum qilgandi.
Iyun oyida AQSh razvedkasi Afg‘oniston hukumati AQSh qo‘shinlari olib ketilganidan olti oy o‘tgach qulashi mumkinligini aytgandi. Bundan tashqari, bir qator G‘arb rasmiylari Afg‘oniston hukumati uch oydan ko‘proq vaqt hokimiyatni ushlab turolmaydi, degan fikrda.
Eslatib o‘tamiz, aprel oyida AQSh prezidenti Jo Bayden Afg‘onistondan Amerika qo‘shinlarini olib chiqib ketish boshlanganini e’lon qilgan edi. Uning so‘zlariga ko‘ra, harbiylar mintaqada ularning oldiga qo‘yilgan barcha maqsadlarga erishgan. Qurolli kuchlarni 11-sentabrgacha to‘liq chiqarib ketish rejalashtirilgan. Amerika va NATO mamlakatlari qo‘shinlari 29-apreldan chiqib ketishni boshladi.
Izoh (0)