АҚШ ҳарбий разведкасининг тахминига кўра, «Толибон» 90 кун ичида Афғонистон пойтахти Кобулни эгаллаб олиши мумкин. Бу ҳақда CNN, Reuters ва The Washington Post манбаларига таяниб хабар берди.
«Толибон»нинг Афғонистондаги муваффақиятлари фонида АҚШ разведкаси ўз прогнозини оғирлаштирди. Шу билан бирга, Кобул қулашининг аниқ вақтини олдиндан айтиб бўлмайди.
The Washington Post’нинг бошқа аноним манбалари таъкидлашича, баъзи прогнозларда жангарилар Кобулни бир ой ичида эгаллаши мумкинлиги айтилмоқда. CNN манбасининг хабар беришича, шунингдек, АҚШ ҳарбийлари шаҳарнинг «Толибон» томонидан яқин 30-60 кун ичида яккалаб қўйилишини тахмин қилмоқда.
6 августдан буён «Толибон» тўққиз вилоятнинг марказларини, жумладан, Қундузни эгаллаб олди. CNN манбасига кўра, уларнинг Кобул шимолида жойлашган Бағлон вилояти ҳудудларини қўлга олиши АҚШнинг эътиборини тортди, чунки бу жой пойтахт мудофааси учун муҳим ҳисобланади.
Ҳозирча АҚШ шаҳарнинг босиб олиниши хавфи остида Кобулдаги элчихонасини тарк этмоқчилигини расман эълон қилмаган. Politico нашрининг манбаларга таяниб хабар беришича, АҚШ Кобулдаги элчихонадан дипломатик ходимларини эвакуация қилиш имкониятини кўриб чиқмоқда.
Манбалардан бирининг айтишича, эвакуация шу ой охиригача амалга оширилиши мумкин.
АҚШ Давлат департаменти расмийси NatSec Daily нашрига берган интервьюсида буни тасдиқлаган: «Ҳар бир дипломатик миссияда бўлгани каби, хавфсизлик шароити оғир бўлганда биз таҳдидларни ҳар куни баҳолаб борамиз ва элчихонамизда ишлаётганларнинг хавфсизлигини таъминлаш учун уларнинг манфаатларига жавоб берадиган қарорлар қабул қиламиз».
Расмийнинг таъкидлашича, АҚШнинг Кобулдаги элчихонаси «27 апрелдан буён буйруқ олиниши билан жўнаб кетиш статусида бўлиб турибди».
Аввалроқ Reuters Европа Иттифоқидаги манбага таяниб, «Толибон» бугунги кунда Афғонистон ҳудудининг 65 фоизини назорат қилаётгани ҳақида хабар берди. Июлда «Толибон» Афғонистон чегарасининг 90 фоизини ўз назоратига олганини маълум қилганди.
Июнь ойида АҚШ разведкаси Афғонистон ҳукумати АҚШ қўшинлари олиб кетилганидан олти ой ўтгач қулаши мумкинлигини айтганди. Бундан ташқари, бир қатор Ғарб расмийлари Афғонистон ҳукумати уч ойдан кўпроқ вақт ҳокимиятни ушлаб туролмайди, деган фикрда.
Эслатиб ўтамиз, апрель ойида АҚШ президенти Жо Байден Афғонистондан Америка қўшинларини олиб чиқиб кетиш бошланганини эълон қилган эди. Унинг сўзларига кўра, ҳарбийлар минтақада уларнинг олдига қўйилган барча мақсадларга эришган. Қуролли кучларни 11 сентябргача тўлиқ чиқариб кетиш режалаштирилган. Америка ва НАТО мамлакатлари қўшинлари 29 апрелдан чиқиб кетишни бошлади.
Изоҳ (0)