“Tolibon” bugungi kunda Afg‘oniston hududining 65 foizini nazorat qilmoqda. Bu haqda Yevropa Ittifoqining yuqori lavozimli rasmiylaridan biri Reuters va AFP’ga ma’lum qildi.
Foto: “Bakivaxti.az”
Manbaning so‘zlariga ko‘ra, jangarilar 11 viloyatning markazlarini bosib olish bilan tahdid qilmoqda. Amerika qo‘shinlarining mamlakatdan olib chiqilishi munosabati bilan Afg‘oniston hukumat kuchlarining imkoniyatlari sezilarli darajada zaiflashgan.
Al-Jazira telekanali axborotiga ko‘ra, “Tolibon” Afg‘onistondagi 34 viloyatdan sakkiztasining markazlarini bir haftadan kam vaqt ichida nazoratga olgan. Birinchi markaz — Zaranj shahri 6-avgustda bosib olingandi.
Mahalliy Tolo News telekanali manbalarga tayanib, xabar berishicha, Afg‘oniston g‘arbida Eron bilan chegara yaqinidagi Farah viloyatning markazi Farah shahrining katta qismi ham “Tolibon” tomonidan egallab olingan. Xususan, politsiya posti qo‘lga olingan. “Tolibon” matbuot kotibi Zabiulla Mujohidning bayonotiga ko‘ra, jangarilar Farah markazini egallagan.
Iyulda “Tolibon” Afg‘oniston chegarasining 90 foizini o‘z nazoratiga olganini ma’lum qildi.
AQSh va uning ittifoqchilari Afg‘onistondan qo‘shinlarini olib chiqa boshlagach, “Tolibon” respublikada keng ko‘lamli hujumlar boshladi. Iyul oyining boshiga kelib, Afg‘onistondan harbiy kontingentning 90 foizdan ortig‘i olib chiqildi. Baydenning so‘zlariga ko‘ra, qo‘shinlarni avgust oxirigacha to‘liq olib ketish rejalashtirilgan.
Avvalroq Rossiya Afg‘onistondagi hokimiyat “Tolibon” jangarilari tomonidan to‘liq egallab olinishi ssenariysiga tayyorligi, ammo voqealarning bunday rivojlanishini haqiqatdan yiroq deb hisoblashini ma’lum qilgandi.
