Turkmanistonda uyiga internet ulashdan oldin fuqarolar VPN xizmatlaridan foydalanmaslikka Qur’on bilan qasam ichishi shart. Bu haqda “Ozodlik radiosi”ning turkman xizmatiga tayanib “Kommersant” xabar berdi.
Qayd etish kerakki, Turkmanistonda fuqarolarning internetga ulanishi nihoyatda cheklangan. Mamlakatda ijtimoiy tarmoq sahifalari va VPN saytlari bloklangan. Pul evaziga telefonlarga VPN o‘rnatgan ustalar hibsga olingan.
“O‘tgan yili men uyimga internet ulash uchun navbatga yozildim. Mening navbatim bir yarim yildan keyin keldi. Wi-Fi’ni olishdan oldin juda ko‘p hujjatlarga imzo chekdim. Endi ular mendan VPN ishlatmasligim to‘g‘risida Qur’onga qasam ichishimni talab qilmoqda. VPN’siz internetda birorta sayt ochilmaydi. Men nima qilishgayam hayronman”, — deya Turkmaniston fuqarosining so‘zlarini keltirdi “Ozodlik”. Fuqaroning familiyasi oshkor qilinmagan.
Xabarda qayd etilishicha, Turkmanistonda fuqarolarning qasam ichish amaliyoti keng tarqalgan, biroq bundan oldin ular Qur’on bilan emas, “Ruhnoma” kitobi bilan qasam ichgan. Ushbu kitob muallifi mamlakatning birinchi prezidenti Saparmurod Niyozov ekani e’lon qilingandi.
Izoh (0)