Moskva va Sankt-Peterburgdan sayyohlarni olib ketayotgan “Vityaz-Aero” kompaniyasining Mi-8 vertolyoti 12-avgust kuni Rossiyaning Kamchatka yarimorolida joylashgan Kronotskiy qo‘riqxonasidagi Kuril ko‘liga qulab tushdi. Halokatdan so‘ng hech qancha o‘tmay Mi-8 vertolyotining bo‘laklari suv ostiga, 130 metr chuqurga cho‘kib ketgan. Vertolyot ko‘l bo‘ylab Nikolayevka qishlog‘idan Xodutka vulqoniga olib boruvchi yo‘nalishda uchayotgan edi.
Mi-8 bortida 16 kishi bo‘lgan: 13 yo‘lovchi, shu jumladan, biri bola va uch ekipaj a’zosi. Olti yo‘lovchi va ikki ekipaj a’zosi cho‘kib ketgan vertolyotdan chiqib, suv yuzasiga suzib chiqishga muvaffaq bo‘ldi, zudlik bilan halokat joyiga yuborilgan qayiqlarda qutqaruv xodimlari ularni qutqarib oldi.
Qolgan sakkiz kishi, jumladan, Mi-8 ekipajining komandiri halok bo‘lgan deya, taxmin qilinmoqda. Mash va Life Shot cho‘kib ketgan Mi-8 bortida bo‘lgan kishilar ro‘yxatini e’lon qildi. Qutqarilganlar orasida shturman Yakov Medvedev va vertolyotning bortmexanigi Marat Madiyev, shuningdek, ilgari “Rossiya-24” telekanalida “Iqtisodiyot. Kun kursi” dasturini olib borgan jurnalist Nikolay Korjenevskiy bor. Jabrlanganlar Petropavlovsk-Kamchatskiyga olib ketilgan. Ulardan ikkitasining ahvoli og‘ir.
Vertolyot qulagan joyda o‘nlab qutqaruvchilar ishlamoqda. G‘avvoslar Mi-8 cho‘kkan chuqurlikka hali tusha olmadi. Mi-8 ning tirik qolgan yo‘lovchilari taxminan to‘qqiz metr chuqurlikdan suzib chiqishga muvaffaq bo‘lgan, dedi qo‘riqxona xodimlari. Ularning so‘zlariga ko‘ra, hozir ko‘lda suv harorati 5-6 darajadan oshmaydi, unda uzoq vaqt qolishning iloji yo‘q.
Mi-8 halokatining asosiy sabablari dvigatelning ishlamay qolishi va uchuvchi xatosi deb atalmoqda. Ma’lum bo‘lishicha, vertolyot kuchli tuman sharoitida qo‘nish uchun pastlagan. Tergov qo‘mitasi havo harakati xavfsizligi qoidalarini buzish moddasi bo‘yicha jinoiy ish qo‘zg‘atdi. Bu modda bo‘yicha aybdor deb topilganlar yetti yilgacha ozodlikdan mahrum qilish bilan jazolanadi.
Mi-8 ga egalik qiladigan “Vityaz-Aero” kompaniyasining bayonotiga ko‘ra, vertolyot uchishdan oldin tekshirilgan va u yaxshi holatda bo‘lgan, vertolyot 2020-yilda kapital ta’mirdan chiqqan. “Vityaz-Aero”ning egasi kamchatkalik tadbirkor va deputat Igor Redkin.
6-iyul kuni Rossiyaning Petropavlovsk-Kamchatskiy shahridan Palana posyolkasiga yo‘lovchi parvozini amalga oshirayotgan An-26 samolyoti dengizga qulagan edi. Samolyot bortida 28 kishi bo‘lgan. Halokatdan so‘ng Rossiyada uch kunlik motam e’lon qilingandi. Dastlab qutqaruvchilar samolyot qulab tushishi oqibatida halok bo‘lgan olti kishining jasadini topishga muvaffaq bo‘lgan, ular suvdan chiqarib olingan. 9-iyul kuni An-26 samolyotidagi barcha yo‘lovchilar va ekipaj a’zolarining jasadi topilgan.
Izoh (0)