Dog‘istonlik erkin kurashchi Abdulrashid Sadulayev Rossiya davlat dumasi deputati Magomed Gajiyev Tokioda bo‘lib o‘tgan olimpiadadagi g‘olibligi uchun unga bir million AQSh dollari miqdorida mukofot berganligini ma’lum qildi. Bu haqda sportchining o‘zi “RIA Novosti”ga intervyu bergan.
Charodin tumanidagi vatandoshim Magomed Gajiyevga meni Olimpiadada g‘olib bo‘lganim uchun bir million dollar mablag‘ bilan mukofotlagani uchun minnatdorlik bildirmoqchiman. Murabbiyim Shamil Omarov ham uning e’tiboridan chetda qolgani yo‘q. Murabbiyim va men bundan buyog‘iga ham faqat g‘alabalar uchun ishlab, yangi marralarni zabt etmoqchimiz.
Sadulayevning Instagram’dagi sahifasida 10-avgust kuni ham shunga o‘xshash post joylashtirilgan va matnning yuqori qismiga sportchining Gajiyev bilan birga tushgan surati ilova qilingan. Biroq ijtimoiy tarmoqdagi postda sportchi va murabbiyga qancha mablag‘ mukofot sifatida berilganiga aniqlik kiritilmagan.
https://www.instagram.com/p/CSbuG8iIcHK/
Abdulrashid Sadulayev — erkin kurash bo‘yicha ikki karra Olimpiada o‘yinlari g‘olibi. U Tokio-2020 da 97 kilogramm vazn toifasidagi final bahsida raqibini mag‘lub etib, oltin medalga erishgan. 2016-yilda Rio-de-Janeyroda o‘tgan Olimpiada o‘yinlarida sportchi 86 kilogramm vazn toifasida chempion bo‘lgandi.
Magomed Gajiyev 2003-yildan buyon Davlat dumasi deputati. Dumaga saylanguniga qadar u soliq organlari va baliq resurslarini himoya qilish tashkilotlarida faoliyat olib borgan. Deputat 2020-yilda to‘ldirgan deklaratsiyaga ko‘ra bir yilda jami 9,115 million rubl (taxminan 124 ming AQSh dollari) miqdorida daromad ko‘rgan.
Eslatib o‘tamiz, O‘zbekistonda Tokio Olimpiadasi oltin medal egalariga Tahoe va 4 sotixli hovli, bronza qo‘lga kiritganlarga esa Trailblazer va 2 xonali uy berilgan.
Izoh (0)