Turkiyada o‘rmon yong‘inlari ortidan suv toshqini boshlandi, deb yozmoqda Reuters.
G‘ayrioddiy kuchli yomg‘ir Turkiyaning Qora dengiz sohilida suv toshqinini keltirib chiqardi. Oqibatda ko‘prik buzilib ketdi, bir qancha qishloqlar elektrsiz qoldi.
Suv toshqinlari Sinop, Bartin, Karabuk va Kastamonu viloyatlariga ta’sir ko‘rsatdi. Xususan, Turkiya shimolidagi Bartin viloyatida ko‘prik qulab tushdi. Favqulodda holat natijasida 13 kishi jarohat oldi, bir kishi yurak xurujidan vafot etdi. Bundan tashqari, qutqaruvchilar toshqinda yo‘qolgan 80 yoshli ayolni qidirmoqda.
Bosh vazirning Favqulodda vaziyatlar va tabiiy ofatlarga qarshi kurash boshqarmasi (AFAD) ma’lumotlariga ko‘ra, 12 ta qishloqda elektr ta’minoti uzilgan. Binolarning birinchi qavatlarini ham suv bosgan, shuningdek, suv mashinalarni oqizib ketgan.
Bartindan 240 kilometr uzoqlikdagi Sinop viloyatida suv toshqini tufayli bir uy qulab tushdi. Viloyatning tabiiy ofatdan zarar ko‘rgan hududlarida ko‘plab uylar va korxonalar suv ostida qoldi. Rasmiylarning ma’lum qilishicha, ushbu hududdagi davlat shifoxonasi ehtiyot chorasi sifatida evakuatsiya qilingan.
10-avgust kuni Oydin viloyatida kuchli yog‘ingarchilikdan keyin ko‘plab uylar va korxonalarni suv bosgan. Bundan tashqari, viloyat va Istanbul o‘rtasidagi yo‘lning bir qismi yuvilib ketgan, buldozerlar yordamida uyida qolib ketgan 20 kishi qutqarib olingan.
Shuningdek, Kastamonu viloyatida kutilmagan va kuchli yog‘ingarchilik oqibatida binolarning yerto‘lalari suv ostida qolgan. Kastamonu shahar markazini Inebolu tumani bilan bog‘laydigan yo‘l to‘sib qo‘yilgan. Hukumat odamlarni mintaqaning turli joylarida suv toshqini va ko‘chkilar yuz berishi haqida ogohlantirdi.
Ma’lumotlarga ko‘ra, hozirda qidiruv-qutqaruv ishlari davom etmoqda. Suv bosgan uylardagi aholi evakuatsiya qilinmoqda, ular asosan puflama qayiqlarda olib chiqilmoqda.
Mudofaa vazirligi Sinop va Kastamonidagi toshqinlar tufayli harbiy-havo kuchlariga tegishli ikkita AC-532 vertolyoti safarbar qilinganini ma’lum qildi.
Iyul oyining ikkinchi yarmida ham Turkiyada suv toshqini yuz bergandi. Mamlakat shimoli-sharqidagi Rizo va Artvin viloyatlarida kuchli yomg‘irlar tufayli suv toshqinlari kelib chiqqan.
Iyul oxirida Turkiya janubida issiq va quruq havo sharoitida o‘rmon yong‘inlari boshlandi. Hukumat taqdim etgan so‘nggi ma’lumotlarga ko‘ra, Antalya viloyatidagi Manavgat kurort shahrida yetti kishi yong‘in qurboni bo‘lgan. Marmarisda yana bir kishi halok bo‘lgan. Jabrlanganlarning umumiy soni 864 kishiga yetdi.
Mahalliy OAV xabariga ko‘ra, “Olov bolalari” terrorchilik tashkiloti o‘rmon yong‘inlari uchun javobgarlikni o‘z zimmasiga olgan. Turkiya prezidenti Rajab Toyyib Erdo‘g‘on yong‘inlardan vayron bo‘lgan hududlarni tiklash uchun kishi boshiga uch tupdan ko‘chat ekishga va’da berdi.
Izoh (0)