Afg‘onistondan AQSh qo‘shinlarini olib ketish jarayoni tugaganidan so‘ng olti oy o‘tib Afg‘oniston hukumati qulashi mumkin. AQSh razvedkasi shunday fikrda, deb yozadi The Wall Street Journal AQSh hukumatidagi manbalariga asoslanib.

Foto: Anadolu Agency

Gazeta qayd etishicha, avvalroq Amerika razvedkasi Afg‘oniston prezidenti Ashraf G‘ani hukumati AQSh qo‘shinlarining ko‘magisiz kamida ikki yilga bardosh bera oladi degan fikrda edi. Biroq so‘nggi paytlarda keskinlikning kuchayishi, hukumat kuchlari va “Tolibon” harakati a’zolari o‘rtasidagi to‘qnashuvlar fonida AQSh razvedkasi o‘z prognozini o‘zgartirdi.

Endi Kobuldagi hukumat Amerika harbiy kontingenti chiqarilgandan keyin olti oydan bir yilgacha bo‘lgan davrda qulashi mumkin deb taxmin qilinmoqda. Bundan tashqari, bir qator G‘arb rasmiylari Afg‘oniston hukumati uch oydan ko‘proq vaqt hokimiyatni ushlab turolmaydi, degan fikrda. Shu bilan birga, gazeta ta’kidlashicha, “Tolibon” faolligining kuchayishi fonida Amerika ma’muriyati harbiylarga qo‘shinlarni olib chiqishni sekinlashtirishni, shuningdek, Kobul yaqinidagi Bagram aerodromi ishini vaqtincha saqlab qolishni tavsiya qilmoqda.

Iyun oyi o‘rtalarida AQSh mudofaa vaziri Lloyd Ostin Amerika qo‘shinlari chiqarilgandan keyin xalqaro terroristik tashkilotlar Afg‘onistondagi faoliyatini tiklashi va ikki yildan so‘ng yana AQShga tahdid sola boshlashi mumkinligini aytgandi. AQSh qurolli kuchlari shtab qo‘mitasi raisi, general Mark Milli uning fikriga qo‘shilib, agar Afg‘oniston hukumati hokimiyatdan chetlatilsa yoki afg‘on xavfsizlik kuchlari tarqatib yuborilsa, u holda xavf oshishi muqarrarligini aytgan.

Eslatib o‘tamiz, aprel oyida AQSh prezidenti Jo Bayden Afg‘onistondan Amerika qo‘shinlarini olib chiqib ketish boshlanganini e’lon qilgan edi. Uning so‘zlariga ko‘ra, harbiylar mintaqada ularning oldiga qo‘yilgan barcha maqsadlarga erishgan. Qurolli kuchlarni 11-sentabrgacha to‘liq chiqarib ketish rejalashtirilgan. Amerika va NATO mamlakatlari qo‘shinlari 29-apreldan chiqib ketishni boshladi. Ayni vaqtda AQSh davlat kotibi Entoni Blinken Afg‘onistondan qo‘shinlar chiqarib ketilgach, mamlakatda hokimiyat tepasiga “Tolibon” jangarilari kelishi mumkinligini istisno qilmadi.