Rossiya Tojikistonga Afg‘oniston bilan chegarada chegara posti qurilishi uchun 1,1 million dollar ajratdi. Tegishli shartnoma tez orada yuqori darajadagi muloqotlar chog‘ida imzolanadi. Bu haqda Rossiya tashqi ishlar vaziri o‘rinbosari Oleg Siromolotov “Interfaks”ga bergan intervyusida ma’lum qildi.
“Tojikistonga moliyaviy tomondan ham yordam ko‘rsatamiz. Hamkorlarimizning iltimosiga binoan, Rossiya respublikaning Xatlon viloyatida Afg‘oniston bilan chegaraning eng zaif qismlaridan birida zamonaviy chegara posti qurilishi uchun 1,1 million dollar ajratadi” — dedi Siromolotov.
Vazir o‘rinbosarining ta’kidlashicha, Rossiya Tojikiston bilan mudofaa boshqarmalari va maxsus xizmatlar sohasida muntazam ishchi aloqalarni qo‘llab-quvvatlaydi.
Shuningdek, Siromolotovning qo‘shimcha qilishicha, Rossiya armiyasi tojik-afg‘on chegarasidagi vaziyatni havo va radioelektron razvedka vositalari yordamida kecha-yu kunduz kuzatib turibdi.
“Chegaradagi vaziyatni tun-u kun kuzatib turish Rossiya harbiylari ixtiyorida bo‘lgan havo va radioelektron razvedka vositalari yordamida tashkil etilgan”,— dedi u. “Dushanbega yordam berish uchun, zarur bo‘lsa, 201-harbiy bazamizdan foydalanishga tayyormiz. Biz uning jangovar va texnik salohiyatini muntazam oshirib bormoqdamiz” .
Vazir o‘rinbosari iyul oxirida Qirg‘izistonning Qand shahridagi harbiy bazadan Tojikistonga Su-25 hujumchi samolyotlari yuborilganini eslatib o‘tdi. Bundan tashqari, bazaga 17 ta modernizatsiyalangan BMP-2M tanklari partiyasi yetkazib berilgan.
Shu bilan birga, Oleg Siromolotovning qo‘shimcha qilishicha, “Afg‘onistonda terrorchi tashkilotlarga qarshi samarali kurashish uchun, birinchi navbatda, mamlakatdagi barcha siyosiy kuchlarning birgalikdagi sa’y -harakatlari zarur”.
“Ularning e’tibori o‘zaro qarama-qarshilikka qaratilgan vaziyatda, afsuski, terrorizmni yo‘q qilishning yaqin istiqbollari haqida gapirishga hojat yo‘q”, — dedi u. Uning ta’kidlashicha, Rossiya Afg‘onistonda milliy yarashuv jarayonini ilgari surish bo‘yicha izchil pozitsiyani egallab turibdi.
“Biz terrorchilik tahdidi va narkojinoyatlardan xoli neytral davlat qurishga ko‘mak beryapmiz. Xalqaro platformalarda turli formatdagi muzokaralar, jumladan, ‘Moskva’ formati, ShHT—Afg‘oniston aloqa guruhi, shuningdek, kengaytirilgan ‘uchlik’ — Rossiya, Xitoy, AQSh va Pokiston bunga hissa qo‘shmoqda”, — dedi bosh vazir o‘rinbosari.
Avvalroq Rossiya Afg‘onistondagi ziddiyat sababli Tojikistonga qurol-yarog‘ yuborgani, Tojikistonda AQSh yordamida qayta ta’mirlangan va qariyb 600 ming dollar pul sarflangan Afg‘oniston bilan chegara posti faoliyatini boshlagani haqida xabarlar berilgan.
Izoh (0)