Afg‘oniston moliya vaziri vazifasini bajaruvchi Xolid Painda “Tolibon” hujumlarining kuchayishi fonida bosim ortishi tufayli mamlakatni tark etdi. Bu haqda TOLONews manbalarga tayanib xabar berdi.
Moliya vazirligidan kelgan maktubdan ma’lum bo‘lishicha, bundan atigi yetti oy oldin ish boshlagan Painda rasmiy tashrif doirasida mamlakatni tark etgan. Moliya vazirining o‘rnini uning o‘rinbosari egallab turibdi. Biroq telekanal manbalarining ta’kidlashicha, moliya vazirining o‘zi qaytib kelmaydi.
Afg‘oniston Milliy Assambleyasi quyi palatasining moliya va budjet qo‘mitasida ta’kidlanishicha, prezidentning atrofida Moliya vazirligiga o‘z odamlarini ko‘tarishga urinayotganlar bor.
TOLONews suhbatdoshlari Paindaning ketishini mamlakatning chegara hududlaridagi to‘qqizta asosiy shahar “Tolibon” nazoratiga o‘tgani bilan bog‘ladi. Chunki ushbu shaharlarning egallanishi davlat daromadlarining ikki baravar kamayishiga olib kelgan. Ammo parlament vakillarining aytishicha, “Tolibon” hujumidan oldin ham Moliya vazirligidagi tayinlovlar daromadlarning qisqarishiga olib kelgan.
Avvalroq Reuters Yevropa Ittifoqidagi manbaga tayanib, “Tolibon” bugungi kunda Afg‘oniston hududining 65 foizini nazorat qilayotgani haqida xabar berdi. Iyulda “Tolibon” Afg‘oniston chegarasining 90 foizini o‘z nazoratiga olganini ma’lum qilgandi.
AQSh harbiy razvedkasining taxminiga ko‘ra, “Tolibon” 90 kun ichida Afg‘oniston poytaxti Kobulni egallab olishi mumkin. Iyun oyida AQSh razvedkasi Afg‘oniston hukumati AQSh qo‘shinlari olib ketilganidan olti oy o‘tgach qulashi mumkinligini aytgandi. “Tolibon”ning Afg‘onistondagi muvaffaqiyatlari fonida AQSh razvedkasi o‘z prognozini og‘irlashtirdi.
Izoh (0)