Россия Тожикистонга Афғонистон билан чегарада чегара пости қурилиши учун 1,1 миллион доллар ажратди. Тегишли шартнома тез орада юқори даражадаги мулоқотлар чоғида имзоланади. Бу ҳақда Россия ташқи ишлар вазири ўринбосари Олег Сиромолотов «Интерфакс»га берган интервьюсида маълум қилди.
«Тожикистонга молиявий томондан ҳам ёрдам кўрсатамиз. Ҳамкорларимизнинг илтимосига биноан, Россия республиканинг Хатлон вилоятида Афғонистон билан чегаранинг энг заиф қисмларидан бирида замонавий чегара пости қурилиши учун 1,1 миллион доллар ажратади» — деди Сиромолотов.
Вазир ўринбосарининг таъкидлашича, Россия Тожикистон билан мудофаа бошқармалари ва махсус хизматлар соҳасида мунтазам ишчи алоқаларни қўллаб-қувватлайди.
Шунингдек, Сиромолотовнинг қўшимча қилишича, Россия армияси тожик-афғон чегарасидаги вазиятни ҳаво ва радиоэлектрон разведка воситалари ёрдамида кеча-ю кундуз кузатиб турибди.
«Чегарадаги вазиятни тун-у кун кузатиб туриш Россия ҳарбийлари ихтиёрида бўлган ҳаво ва радиоэлектрон разведка воситалари ёрдамида ташкил этилган»,— деди у. «Душанбега ёрдам бериш учун, зарур бўлса, 201-ҳарбий базамиздан фойдаланишга тайёрмиз. Биз унинг жанговар ва техник салоҳиятини мунтазам ошириб бормоқдамиз» .
Вазир ўринбосари июль охирида Қирғизистоннинг Қанд шаҳридаги ҳарбий базадан Тожикистонга Су-25 ҳужумчи самолётлари юборилганини эслатиб ўтди. Бундан ташқари, базага 17 та модернизацияланган БМП-2М танклари партияси етказиб берилган.
Шу билан бирга, Олег Сиромолотовнинг қўшимча қилишича, «Афғонистонда террорчи ташкилотларга қарши самарали курашиш учун, биринчи навбатда, мамлакатдаги барча сиёсий кучларнинг биргаликдаги саъй -ҳаракатлари зарур».
«Уларнинг эътибори ўзаро қарама-қаршиликка қаратилган вазиятда, афсуски, терроризмни йўқ қилишнинг яқин истиқболлари ҳақида гапиришга ҳожат йўқ», — деди у. Унинг таъкидлашича, Россия Афғонистонда миллий ярашув жараёнини илгари суриш бўйича изчил позицияни эгаллаб турибди.
«Биз террорчилик таҳдиди ва наркожиноятлардан холи нейтрал давлат қуришга кўмак беряпмиз. Халқаро платформаларда турли форматдаги музокаралар, жумладан, ‘Москва’ формати, ШҲТ—Афғонистон алоқа гуруҳи, шунингдек, кенгайтирилган ‘учлик’ — Россия, Хитой, АҚШ ва Покистон бунга ҳисса қўшмоқда», — деди бош вазир ўринбосари.
Аввалроқ Россия Афғонистондаги зиддият сабабли Тожикистонга қурол-яроғ юборгани, Тожикистонда АҚШ ёрдамида қайта таъмирланган ва қарийб 600 минг доллар пул сарфланган Афғонистон билан чегара пости фаолиятини бошлагани ҳақида хабарлар берилганди.
Изоҳ (0)