O‘zLiDeP markaziy kengashining 7-avgust kuni o‘tkazilgan navbatdan tashqari plenumi boshlanishidan avval OAV vakillariga intervyu bergan energetika vaziri Alisher Sultonov koronavirusga qarshi emlanganini ma’lum qildi, deya xabar bermoqda “Daryo” muxbiri.
“Nima vaksina bo‘lsa ham olish kerak. Juda ham ko‘p yaqinlarim kasal bo‘ldi. Xudoga ming shukr, yoshi katta bo‘lsa ham ularga vaksina qildirgan ekanman. O‘z vaqtida o‘zimga ham, oilamdagilarga ham qildirgan ekanman. Mana, yonimdagilardan kim kasal bo‘lgan bo‘lsa, hammasida yengil o‘tdi. Ishxonadagilarga ham qildirganman. Vaksina olish kerak baribir”, — dedi Sultonov.
Aynan qaysi vaksinani olganini eslay olmagan hukumat vakili ikki marta emlanganini ta’kidlarkan, “Birinchi marta dekabrda olganman, ikkinchi marta ikki oy oldin oldim”, — dedi.
Sultonov qaysi vaksina bilan emlanganiga aniqlik kiritish maqsadida “Daryo” muxbiri Energetika vazirligining matbuot kotibi Elmira Bekmurodova bilan bog‘landi. U Alisher Sultonovning vaksina olganini qayd etib, ammo aynan qaysi vaksina bilan emlanganini bilmasligini aytdi.
Avvalroq O‘zbekiston bosh vaziri Abdulla Aripov va uning o‘rinbosarlari Sardor Umurzoqov va Behzod Musayev koronavirusga qarshi emlangani haqida xabar berilgan edi.
Vazirlardan innovatsion rivojlanish vaziri Ibrohim Abdurahmonov, adliya vaziri Ruslanbek Davletov, maktabgacha ta’lim vaziri Agrippina Shin, xalq ta’limi vaziri Sherzod Shermatov, oliy va o‘rta maxsus ta’lim vaziri Abduqodir Toshqulov, madaniyat vaziri Ozodbek Nazarbekov, mahalla va oilani qo‘llab-quvvatlash vaziri Rahmat Mamatov koronavirusga qarshi vaksina olgani ma’lum.
Izoh (0)