ЎзЛиДеП марказий кенгашининг 7 август куни ўтказилган навбатдан ташқари пленуми бошланишидан аввал ОАВ вакилларига интервью берган энергетика вазири Алишер Султонов коронавирусга қарши эмланганини маълум қилди, дея хабар бермоқда «Дарё» мухбири.
«Нима вакцина бўлса ҳам олиш керак. Жуда ҳам кўп яқинларим касал бўлди. Худога минг шукр, ёши катта бўлса ҳам уларга вакцина қилдирган эканман. Ўз вақтида ўзимга ҳам, оиламдагиларга ҳам қилдирган эканман. Мана, ёнимдагилардан ким касал бўлган бўлса, ҳаммасида енгил ўтди. Ишхонадагиларга ҳам қилдирганман. Вакцина олиш керак барибир», — деди Султонов.
Айнан қайси вакцинани олганини эслай олмаган ҳукумат вакили икки марта эмланганини таъкидларкан, «Биринчи марта декабрда олганман, иккинчи марта икки ой олдин олдим», — деди.
Султонов қайси вакцина билан эмланганига аниқлик киритиш мақсадида «Дарё» мухбири Энергетика вазирлигининг матбуот котиби Элмира Бекмуродова билан боғланди. У Алишер Султоновнинг вакцина олганини қайд этиб, аммо айнан қайси вакцина билан эмланганини билмаслигини айтди.
Аввалроқ Ўзбекистон бош вазири Абдулла Арипов ва унинг ўринбосарлари Сардор Умурзоқов ва Беҳзод Мусаев коронавирусга қарши эмлангани ҳақида хабар берилган эди.
Вазирлардан инновацион ривожланиш вазири Иброҳим Абдураҳмонов, адлия вазири Русланбек Давлетов, мактабгача таълим вазири Агриппина Шин, халқ таълими вазири Шерзод Шерматов, олий ва ўрта махсус таълим вазири Абдуқодир Тошқулов, маданият вазири Озодбек Назарбеков, маҳалла ва оилани қўллаб-қувватлаш вазири Раҳмат Маматов коронавирусга қарши вакцина олгани маълум.
Изоҳ (0)