O‘zbekiston bosh vaziri Abdulla Aripov o‘zbek-xitoy vaksinasi bilan emlangan

O‘zbekiston bosh vaziri Abdulla Aripov ZF-UZ-VAC-2001 o‘zbek-xitoy vaksinasi bilan birinchilardan bo‘lib emlangan. Bu haqdagi axborotni bosh vazir matbuot xizmati xodimi Bekzod Hidoyatov “Daryo”ga tasdiqladi.

Ma’lum bo‘lishicha, bosh vazir Abdulla Aripov o‘zbek-xitoy vaksinasi bilan 2021-yil boshida to‘liq emlanib bo‘lgan. Uch bosqichli emlanish jarayonining birortasidan so‘ng hukumat rahbarida nojo‘ya ta’sirlar sezilmagan.

Avvalroq prezident Shavkat Mirziyoyev koronavirusga qarshi to‘liq emlanib bo‘lgani ma’lum bo‘lgan edi. “Prezidentimiz mas’uliyatli fuqaro sifatida, albatta, vaksina olganlar. O‘sha vaqtda O‘zbekistonda uchta vaksina — ZF-UZ-VAC-2001, AstraZeneca va ‘Sputnik V’ ro‘yxatdan o‘tgan edi. Prezidentimiz shu vaksinalardan biri bilan to‘liq emlanganlar”, — deya ma’lum qilgandi prezident matbuot kotibi Sherzod Asadov 2-avgust kuni bo‘lib o‘tgan brifingda.

Xitoyning Zhifei Longcom Biopharmaceutical kompaniyasi tomonidan ishlab chiqilgan ZF-2001 rekombinant vaksinasining uchinchi bosqich klinik sinovlari O‘zbekistonda dekabr oyida boshlangan edi. O‘zbekistonlik bir qator yuqori martabali amaldorlar, xususan, innovatsion rivojlanish vaziri Ibrohim Abdurahmonov butun oilasi bilan shu sinovlarda qatnashgan edi.

Fevral oyiga kelib, Xitoy kompaniyasi O‘zbekistonni vaksina hammuallifi deb tan olgan, shundan so‘ng O‘zbekistonda qo‘llanilayotgan emdorining nomi ZF-UZ-VAC-2001 deb o‘zgartirilgan. 1-mart kuni vaksina O‘zbekistonda rasman ro‘yxatga olingani ma’lum qilindi, 1-apreldan esa aholini, xususan, ushbu vaksina bilan ommaviy emlash ishlari boshlandi.

5-avgust holatiga ko‘ra O‘zbekistonga koronavirusga qarshi 12,5 million dozadan ortiq vaksina keltirilgan bo‘lib, shundan 8,5 million dozasi ZF-UZ-VAC-2001 vaksinasidir. Kelgusida yana 12 million doza o‘zbek-xitoy vaksinasi keltirilishi kutilmoqda. O‘zbekistonliklar eng ko‘p aynan shu vaksina bilan emlanmoqda — birgina 2-avgust kuni vaksinaning 1-dozasi bilan emlangan 243 493 o‘zbekistonlikning 213 868 nafari (87 foizi) o‘zbek-xitoy vaksinasini olgan.