Аndijon viloyatining Аndijon tumaniga hokimlik qilgan Hasanboy Hakimov 2021-yil 12-avgust kuni 78 yoshida pnevmoniya asoratlaridan vafot etdi, deya xabar bermoqda “Daryo” muxbiri.
Hasanboy Hakimov 1943-yil Аndijon tumanida tug‘ilgan, Аndijon paxtachilik (hozirgi qishloq xo‘jaligi va agrotexnologiyalar) institutini tamomlagan. Mehnat faoliyati davomida Toshkent qishloq xo‘jaligi mashinasozligi zavodida slesar, “Аsaka motor ta’mir” korxonasida direktor o‘rinbosari, bosh muhandis, direktor lavozimlarida ishlagan. 1987—1993-yillarda viloyat agrosanoat birlashmasi raisi o‘rinbosari, “O‘zselxoztexnika” viloyat birlashmasi raisi kabi mas’ul vazifalarda faoliyat ko’rsatgan.
1993-yildan 2006-yilga qadar Аndijon tumanini boshqargan. Shuningdek, o‘sha yillari O‘zbekiston Respublikasi Oliy Majlisi va mahalliy kengash deputati sifatida ham faollik ko‘rsatgan.
Eslatib o‘tamiz, 2020-yil 29-sentabrida Andijon viloyati Xonobod shahri hokimi Musaxon Mamadaliyev o‘tkir yurak-qon tomir yetishmovchiligi kasalligidan, 7-oktabr kuni viloyatning Oltinko‘l tumani hokimi Nazirjon O‘rinboyev pnevmoniya kasalligi asoratlari va o‘tkir yurak-qon tomir yetishmovchiligidan vafot etgan edi. Bundan tashqari, 2017-yil oktabrida viloyatning Ulug‘nor tumani hokimi Asilbek Yusupov miyaga qon quyilishi oqibatida, 31-iyul kuni esa 2020-yilning 4-martidan buyon Bo’ston tumani hokimi vazifasida ishlab kelayotgan Sadbarxon Mamitovaning og‘ir xastalikdan vafot etgani haqida xabar berilgandi.
Izoh (0)