12-avgust kuni Xalq deputatlari Payariq tumani kengashining navbatdan tashqari sessiyasi o‘tkazildi, deb xabar beradi Samarqand viloyati hokimligi matbuot xizmati.
Ma’lum qilinishicha, Samarqand viloyati hokimi Erkinjon Turdimov qatnashgan sessiyada tashkiliy masala ko‘rilgan.
Sessiyada Payariq tumaniga 2019-yildan buyon rahbarlik qilib kelayotgan Dilshod Musinov o‘z arizasiga ko‘ra lavozimidan ozod etilgan.
Shu paytgacha Samarqand viloyati qishloq xo‘jaligi boshqarmasi boshlig‘i vazifasida ishlab kelgan Zafar Ergashev Payariq tumani hokimi etib tasdiqlangan. Shuningdek, hokimlik matbuot xizmatining xabar berishicha, sessiyada tumanga yangi prokuror, IIB boshlig‘i hamda Davlat soliq inspeksiyasi rahbari tayinlangan.
Eslatib o‘tamiz, 2020-yilning oktabrida Payariq tumani hokimi Dilshod Musinov tuman respublikadagi 33 ta “qoniqarsiz” hudud safidan joy olgani uchun eng birinchi navbatda o‘zi aybdor ekanligini aytib, tuman aholisidan uzr so‘ragandi.
Avvalroq Buxoro viloyati davlat soliq boshqarmasi boshlig‘i G‘ijduvon tumani hokimi etib tayinlangani, Guliston tumanida “to‘rtlik” almashgani va tovar-xomashyo birjasi Sirdaryo viloyati filiali direktori Guliston hokimi etib tayinlangani to‘g‘risida xabar berilgandi.
Izoh (0)