“PSJ”ga o‘tishga nima sabab bo‘lgani, yangi jamoadagi maqsadlari va qachondir “Barselona”ga qarshi o‘ynashi haqida. Lionel Messi “PSJ”dagi ilk matbuot anjumanida qatnashdi

Hujumchi Lionel Messi “PSJ”ga o‘tganidan keyin ilk matbuot anjumanida ishtirok etdi va qator savollarga javob berdi.

“PSJ”ga o‘tgani haqida

Juda xursandman. “Barselona”dan qay tarzda ketganimni hamma biladi. Ammo “PSJ”ga o‘tganimdan keyin o‘zimni baxtli his qilyapman.

Mashg‘ulotlarni boshlashni sabrsizlik ila kutyapman, chunki o‘z jamoadoshlarim bilan yaqindan tanishishni va faoliyatimning yangi bosqichini boshlashni juda xohlayman. “PSJ” rahbariyatiga minnatdorchilik bildiraman. Hammasi mukammal o‘tdi. Barchangizga bunday kutib olish uchun rahmat.

Juda baxtiyorman, g‘alabaga bo‘lgan tashnaligim xuddi avvalgidek. Tarkibimiz juda ajoyib. Barcha sovrinlar uchun kurashishga tayyormiz. Shuning uchun ham bu klub bilan shartnoma imzoladim.

Barcha parijliklarga minnatdorchilik bildirmoqchiman. Men kelganimda, bu yerda o‘ziga xos kayfiyat hukmron edi. Bu juda ajoyib bo‘ldi.

Chempionlar Ligasida g‘alaba qozonmoqchiligi haqida

Barcha muxlislardan minnatdorman, bunga shunchaki aql bovar qilmaydi. Katta rahmat. Ko‘rishish va gaplashish uchun hali ko‘p vaqtimiz bo‘ladi. Ajoyib mavsum o‘tkazamiz deb umid qilaman.

Chempionlar Ligasini yutish qiyin, bunga kuchli tarkib kerak. Omad ham muhim omildir. Ba’zida dunyoning eng yaxshi jamoasi ham sovrin yuta olmaydi. Biz esa Chempionlar Ligasida g‘olib chiqmoqchimiz.

Jamoadagi do‘stlari haqida

Kiyinish xonasida ko‘plab do‘stlarim bor. Jamoamizga nazar tashlasangiz, maqsadimizga [Chempionlar Ligasida g‘olib bo‘lish] erishish uchun ko‘p imkoniyatlar borligini ko‘rasiz. Hammamiz bir narsani xohlaymiz. Umid qilamanki, birgalikda maqsadimizni amalga oshira olamiz.

Jamoadagi futbolchilar bu yerga kelishimda muhim rol o‘ynadi. Biz yana birgamiz — men, Neymar, Paredes, di Mariya. Albatta, bu muhim rol o‘ynadi.

Qachondir “Barselona”ga qarshi o‘ynashi haqida

Ketishimdan oldin “Barsa” muxlislariga ularning sevgisidan doim minnatdor bo‘lishimni aytgandim. Ular kuchli klub bilan shartnoma imzolashimni bilardi.

“PSJ” bilan bir xil maqsadlarga egamiz. Qachondir “Barsa”ga qarshi o‘ynay olamanmi, bilmayman. Bir tomondan, bu juda yaxshi bo‘lardi, lekin uyda boshqa jamoa safida o‘ynash g‘alati.

Fransiya chempionati darajasi haqida

Bu yerda mening do‘stlarim o‘ynaydi, ba’zida ularning o‘yinlarini kuzatardim. “PSJ” yordamida Fransiya chempionati katta yutuqlarga erishdi. Qolgan klublar “PSJ”ga qarshi kurashish uchun rivojlanishga harakat qilmoqda.

Bu chempionatni bilaman. Bu men uchun yangi tajriba bo‘ladi. Yangi liga bilan tanishish imkoniyatiga ega bo‘lganimdan juda xursandman.

Lionel Messi, “PSJ” hujumchisi