Dunyoning turli qit’alarida — Amerika, Yevropa, Afrika va Osiyoda davom etayotgan o‘rmon yong‘inlari allaqachon o‘n minglab gektar maydonlarni vayron qildi. Bir qator mamlakatlarda 2021-yilda sodir bo‘lgan yong‘inlar soni o‘tgan yillardagi o‘rtacha ko‘rsatkichdan oshib ketdi.
NASA agentligining FIRMS tizimi sun’iy yo‘ldosh xaritasiga ko‘ra, yong‘inlar dunyoning ko‘p joylarida — Shimoliy va Janubiy Amerikaning katta qismida, Afrika platosida va Arabiston yarim orolining shimolida, Yevropada, xususan, O‘rta Yer dengizi sohilida, qit’aning shimoliy va sharqiy qismlarida qayd etilgan.
O‘rmon yong‘inlari Hindiston sohillari, Rossiyaning Sibir hududi, Xitoy, Malayziya, Indoneziya, Okeaniya va Avstraliyaning sharqiga ham ta’sir ko‘rsatdi.
Gretsiya
Gretsiyada 10 kundan buyon davom etayotgan o‘rmon yong‘inlarining aksariyati ko‘plab urinishlarga qaramay nazoratga olinmadi. Hukumat hammasi bo‘lib yana 55 ta yong‘in o‘chog‘ini o‘chirishga harakat qilmoqda.
Afina milliy rasadxonasi (EAA) Yevropa kosmik agentligining Sentinel 2 missiyasi sun’iy yo‘ldosh ma’lumotlariga tayanib xabar berishicha, Gretsiyadagi o‘rmon yong‘inlari minglab gektar yer maydonlarini vayron qilgan. EAA o‘rmonli hududlarda yong‘inlarning yanada kengayishi mumkinligidan ogohlantirdi.
Egriboz oroli mahalliy hukumatining ma’lum qilishicha, orolda yetti kundan buyon o‘rmon yong‘inlari davom etmoqda va minglab gektar hududlar butunlay vayron bo‘lgan, kamida 1000 ta uy yonib ketgan.
Mavzuga doir: Gretsiyada yirik o‘rmon yong‘inlari sodir bo‘lmoqda. Yuzlab uylar vayron bo‘ldi (foto va video)
Rossiyada ham yirik o‘rmon yong‘inlari davom etmoqda. Mamlakatda hali 155 ta yong‘in o‘chog‘ini bartaraf etish imkoni bo‘lmadi. Sibirning ikkita qishlog‘idagi aholi to‘liq evakuatsiya qilindi. Mahalliy hukumatning xabar berishicha, yong‘inlarni o‘chirishga 3600 o‘t o‘chiruvchi jalb qilingan.
Yoqutistonda ham iyul oyi boshida sodir bo‘lgan o‘rmon yong‘inlarini o‘chirish ishlari haligacha davom etmoqda.
Yoqutiston prezidenti Aysen Nikolayev qulagan daraxtlar ko‘rinishidagi to‘siqlarni olib tashlash orqali o‘t o‘chiruvchilarning o‘rmon yong‘inlari zonasiga kirishini yengillashtirishni buyurdi.
Rossiya Federatsiyasi O‘rmon xo‘jaligi federal agentligining ma’lum qilishicha, 9-avgust holatiga ko‘ra, 1 milliard 793 million gektar maydonda o‘rmon yong‘inlarini o‘chirish ishlari davom etmoqda. Agentlik yong‘inni o‘chirishga 7 mingga yaqin o‘t o‘chiruvchilar va yuzlab texnikalar jalb qilinganini qayd etdi. O‘tgan hafta davomida hammasi bo‘lib 372 ta yong‘in o‘chog‘i o‘chirildi.
AQSh
AQShda o‘rmon yong‘inlarining faol o‘choqlari soni 107 taga yetdi. Taxminan, 920 ming gektar o‘rmon maydonlari yong‘indan zararlandi. Kaliforniyada kuchli o‘rmon yong‘inlari, taxminan, uch haftadan beri davom etmoqda. Rasmiylar 8 kishi bedarak yo‘qolgani haqida xabar berdi.
Izoh (0)